Nu lohká Jan Gunnar Furuly Sápmi humorráiddu birra man Runar Balto sárgu, go lea áđđestallan olgoriikkalaš sárgojeaddji ja almmuhan dan iežas dáiddan.
Sápmi humorráiddu sárgojeaddji Runar Balto lea aiddobáliid almmuhan ráiddu mii govvida movt «Titanic» fanas, mii vuojui 1912:s, livččii dálá áiggis vudjon.
Govas oidnojit olbmot geat leat geavvan čáhcái, geat govvejit fanas vuodjuma mátketelefuvnnaiguin.
Orro čielga kopieren
Aftenpostena journalista Jan Gunnar Furuly lea iežas «Facebook» profiilas almmuhan guokte gova. Nuppi lea sárgon Pierre Brignaud, gii orru Qubecas Kanadas, ja nuppi lea sárgon Runar Balto, mii lea almmuhuvvon Ságat aviissas mannan vahkus.
Brignaud govva lea diibmá suoidnemánus boahtán goalmmát sadjái «Just for Laughs International Visual Arts Contest», dahje Internašunála visuála dáiddagilvvus, Montrealas Kanadas.
Furuly mielas leat dát guokte gova áibbas ovttaláganat.
– Dat orru čielga áđđestallan Balto bealis, ja njulgestaga kopiija originála govas, lohká Furuly.
Ávvir lea máŋgii geahččalan oažžut Runar Balto ságaide vástidit plágiahta čuoččuhusaid, muhto eat leat vel lihkostuvvan.
Ii kommentere
Sápmi ráidu almmuhuvvo beaivválaččat Ságat ja Ávvir aviissas. Ságat aviissa váldodoaimmaheaddji Geir Wulff ii áiggo kommenteret ášši ovdal go lea iskan ášši ja ieš hupman Runar Baltoin.
Vuordit deaddilemiin
Ávvira váldodoaimmaheaddji Kari Lisbeth Hermansen lohká nu guhká go eai leat ožžon ságaide Runar Balto ja gullan su beali áššis, de eai deaddel dán ráiddu.
– Govat orrot hui ovttaláganat, muhto lea váttis dadjat lea go plagiáhtta. Mis lea buorre ovttasbargu Baltoin, iige leat goassige čuoččuhuvvon plagieren ovttage, nu ahte lea vuoiggaleamos ahte son ieš beassá muitalit iežas beali áššis, lohká Hermansen.
