-Almmuhus-
OĐĐASAT– Orru mannamin bures

– Orru mannamin bures

-

-

Finnmárkku fylkkadikki sátnejođiheaddji, Bargiidbellodaga Runar Sjåstad, lohká sii leat oaidnán sin bellodat oažžu olu jienaid dál, muhto eai duostta vuos illudit.

Diibmu 21.00 giddejedje válgalanjaid ja dál leat ovdalgihtii jienat almmuhuvvon.

Finnmárkku fylkkadikkeválggas čájehit logut ahte Bargiidbellodat lea ožžon 42,7 proseantta jienain ja lea ožžon 3,1 proseantta eambbo jienaid go 2011 válggas.

 

 – Mii leat dál válgagohcinlanjas ja mis lea buorre mokta. Eat mii duostta vuos illudit, muhto logut orrut mannamin Bargiidbellodaga guvlui ja šattašii buorre jus boađus šattašii ná, de livčče buorre. Eat mii jáhke mii oažžut čielga eanetlogu. 

Nu lohká Bargiidbellodaga Finnmárkku Fylkkasátnejođiheaddji, Runar Sjåstad, gii maid lea fylkkasátnejođiheaddji evttohas.

Son lohká iežas jáhkit šaddat eará bellodagain ovttasbargat ja dat lea su mielas hui buorre go dalle šaddá buoret boađus iešguđet áššiin.

 

Bealle miljovnna jienastan

Finnmárkkus lea 10.610 olbmo jienastan ovdalgihtii, Tromssas lea ges 17.064 jienastan ovdalgihtii, Nordlánddas 27.859, Davvi-Trøndelagas 14.559. Norggas lea oktiibuot 567 220 jienastan ovdalgihtii.

 

Moadde proseantta eanet

Bellodat Ruoksat lea ožžon 1,0 proseanta ja lea mannan ovddos 0,1 proseantta. Sosialisttalaš gurutbellodat lea ožžon 6,9 proseantta ja lea ožžon 0,8 proseantta. Guovddášbellodat oaččui 5,0 proseantta ja mannan ovddos 1,1 proseanttain. Birasbellodat ruoná lea maid mannan ovddos 3,6 proseanttain ja lea ožžon oktiibuot 4,2 proseantta dássážii. Gurut lea ožžon 7,1 proseantta jienain ja ožžon 2,4 proseantta eanet jienaid ovddit fylkadikkeválggas. Ovddádusbellodat lea ožžon 13,1 proseantta ja lea mannan 3,5 proseantta ovddos.

 

Moadde proseantta massán

Kristtalaš álbmotbellodat oažžu dušše 2,9 proseantta jienain ja lea massán 0,3 proseantta ovddit fylkkadikkeválgga ektui. Olgešbellodat oažžu 12,9 proseantta ja lea massán 7,5 proseantta jienain. Maiddái eará bellodagat, smávit, leat ožžon 4,1 proseanta ja lea massán 2,3 proseantta jienain.

Dát ledje ovdalgihtii jienat mat leat lohkon.

-Almmuhus-