Orohat 13, Lágesduottar, lea čállán reivve Finnmárkku Fylkkamánnii gos bivdet sin čorget eret boraspiriid, erenoamážit getkkiid, sin guottet báikkis.
Sii leat gieskat orohatstivrras mearridan ahte sii galget bivdit fylkkamánni čorget eret boraspiriid doppe, go dat lea nu gohčoduvvon guovlu gos eai galgga leat boraspiret.
Ránnját massán olu
Orohatstivra ákkasta dainna go ránnjáorohat, Orohat 9 Čorgaš, lea leamaš guokte mánu sin guottet eatnama alde, ja sii leat dieđihan olu bohccuid massán boraspiriide, muhtun oasi leat Luonddubearráigeahččit maid duođaštan.
Guovlu man birra lea sáhka lea Idjavuonduoddaris, Riikageainnu 98 davábeale.
Hoahppu
Orohatovdaolmmoš, John Idar Anti čállá ahte sii leat dál balus go ránnjáorohat lea olu massán dan guovtti mánus sin guotteteatnan alde, mii ieš alddis duođašta ahte doppe leat olu boranávddit.
Sii hoahpuhit Fylkkamánni, ja čállet reivves ahte sis álgá guottet sullii mánu geahčen, ja dalle ii sáhte šat maidege dahkat eambbo go ravddaid dušše gozihit.
Sii čállet doaibma ferte hui johtilit álggahuvvot, vai ii čuožžil roassu ládje olu miessejávkan.
Duođašta boraspiriid
Orohat 9, Čorgaša nubbijođiheaddji, Magne Ballovara, duođašta ahte sii leat massán boraspiriide olu bohccuid dan guovllus man birra Lágesduottar čállá reivvestis.
Son muitala ahte sii bággehalle dálkkiid dihte orrut báikkis veahá guhkit go lei dárbu.
– Ja diehttelasat go nie olu lei boraspire juste dan guovllus, eat mii gal orron das eat minuhta ge guhkit go fertiimet. Dál leat geasseorohagas, muitala Ballovara.