-Almmuhus-
OĐĐASATOrkeastar, luohti ja garrarockagitára Romsii

Orkeastar, luohti ja garrarockagitára Romsii

-

-

Jus it leat gullan luođi ovttas orkeastariin ja garrarockagitárain, de lea dál vejolašvuohta dan dahkat Romssas loahpas dán mánu.

Lea dovddus sámi musihkar, lávllačálli ja musihkkabuvttadeaddji, Frode Fjellheim, gii boahtá Romsii bihtáin «The Orchestral Joik».

Bihttá lei ráhkaduvvon ja čájehuvvon diimmá Nordlándda Musihkkafeastavahkus Bådådjos.

Dál čájehuvvo Romssa Nordlysfestivalen nammasaš feastiválas.

 

Beakkálmasat

Jus ii vel dál oro geasuheame bihttá, de sáhttit namuhit ahte mielde das, earret namuhuvvon Fjellheim, de leat Mari Boine, Márjá Mortensson, Anneli Drecker, Berit Norbakken Solset ja maid beakkán TNT joavkku gitáračuojaheaddji, Ronnie Le Tekrø.

Bihtá láidesteaddji lea dovddus Anders Eljas – dovddus go lea ovttasbargan earret eará Ruoŧa superjoavkkuin ABBAin.

Bihttá čájehuvvo guktii festiválas, sihke ođđajagemánu 26. ja 27. beaivvi.

Festivála álgá ođđajagemánu 25. beaivvi ja bistá gitta guovvamánu 4. beaivái.

Doppe leat earret eará teáhterčájálmasat ja konsearttat.

-Almmuhus-