Dán jagáš Onroad Finnmark sihkkelgilvui, mas vuolgga lea Álttás, leat dieđihuvvon oktiibuot 75 oassálasti iešguđet ge distánssaide. – Vuorddán buori gilvvu ja garrasit sihkkelastima go diibmá, lohká Sirpmá ja Midnattsol sihkkeljoavkku gilvvohalli Ole Georg Pettersen.
Dán jagáš Onroad Finnmark sihkkelgilvui, mas vuolgga lea Álttás, leat dieđihuvvon oktiibuot 75 oassálasti iešguđet ge distánssaide. – Vuorddán buori gilvvu ja garrasit sihkkelastima go diibmá, lohká Sirpmá ja Midnattsol sihkkeljoavkku gilvvohalli Ole Georg Pettersen.
Lea jo goalmmát geardi go Onroad Finnmark sihkkelgilvu lágiduvvo.
Sihkkelastin dáhpáhuvvá geaidnoráigge ja guhkimus mátki lea 444 kilomehtera. Dán mátkki vuolgga lea Álttás, ja oasseváldit de sihkkelastet Kárášjohkii, Levdnjii, Skáidái ja fas Áltái Suoidneleavšši badjel.
Odne eahkedis jo dollejit sihkkelmátkái dat geat eai oaivvil iežaset duolbmat issoras leavttuin ja geat soitet ádjánit veahá guhkit go gilvohállit.
Kárášjogas ges lea vuolggá 244 kilomehtergaskkas, Leavnnjas lea vuolggá oaneaheamos mátkái – 174 kilomehtera.
Vuordá garra sihkkelastima
Váldobeaivi lea lávvordat. Dalle vulget Álttás diibmu 6 iđđedis vuos joavkkut. Dán háve leat das golbma joavkku: Team Hammerfest dievddut, Team Hammerfest nissonat ja Team Sirbmá ja Midnattsol.
Deatnulaš Ole Georg Pettersen (32), gii sihkkelastá Sirpmá ovddas, lea jo nuppes searvame dán sihkkelgilvui.
– Vuorddán buori gilvvu ja garrasut sihkkelastima go diibmá. Vaikko orru buoret dálki go diibmá, de leat guokte unnit sihkkelasti joavkkus. Lea gelddolaš oaidnit movt joavku doaibmá earenoamážit go Leavnnjas vuolgit.
Maiddái Pettersen iežas lohká hárjehallan bures dán jagi.
– Lean hárjehallan bures dán jagi ja dovddan ovdáneami diimmá ektui. Soitet earát, geaiguin árabut dán jagi lean gilvalan, šaddan heajubun.
Diibmu 07:00 iđđedis Álttás vulget individuála gilvohallit. Diibmu 09.00 leages vuolgga 244 kilomehter distánssas Kárášjogas.
– Son dat hástalii mu sihkkelastit
Ávvira journalista ja áŋgiris sihkkelasti Alice Balto, gii lea ovdal čađahan guktii Bingesrittet, Savkadasritt, ja Offroad Finnmark sihkkelgilvvuid, lea okta gii lávvordaga vuolgá duolbmut dán 244 kilomehtera. Alice ii loga geaidnoráigge sihkelastima leat su mielamiel. Muhto fertii dan háve vuolgit mielde doarjjan iežas buori ustibii.
– Mu skibir Dina Iversen lea mu veahkki leamaš OffroadFinnmark gilvvus guokte maŋimuš jagi, ja áigu dán jagi maid veahkkin. Son dat hástalii mu sihkkelastit iežas fárus, lean dego velggolaš sutnje, lei jo masá bággu searvat go hásttii.
Balto ja Iversen leaba gohčodan iežaska joavkku Team JarleBoine vuol. Muhto formálalaččat sihkkelastiba individuála luohkás go eaktun searvat joavkonamas lea unnimustá golbma gilvohalli joavkkus.
– Ean lean go vuos guovttá, muhto dál leat golmmas vel searvan. Liss-Beate, Benjamin ja Ruth Cecilie. Eat leat joavkolgilvvus mielde, muhto áigut ovttas sihkkelastit ainjuo Skáidái. Dasto joatkit ovttas, ja go lahkonat Álttá, de oažžu gii dal háliida dollet jus leat fámut dasa.
Oaneheamos distánssa gilvohallit vulget ges lávvordaga diibmu 12:00 Leavnnjas.
