Servodatberošteaddji Pirita Näkkäläjärvi Suoma beale Sámis čállá eaŋgasgiel kolumnnastis, ahte ON olmmošriektekomitea varas mearrádusat addet ođđa doaivaga sámiide.
– ON olmmošriektekomitea attii mannan vahkus guokte mearrádusa, maid mielde lei boastut, ahte Suoma alimus hálddahusriekti luittii 97 látti olbmo Suoma Sámedikki válgalogahallamii Suoma sámedikki dáhtu vuostá, čállá Pirita Näkkäläjärvi preassadieđáhusas man lea almmuhan.
Komitea gávnnahii maid, ahte Suopma loavkašuhttá álbmogiidgaskasaš siviila ja politihkalaš vuoigatvuođaid soahpamuša (SP-soahpamuša), man Suopma lea ratifiseren jagis 1975.
Pirita Näkkäläjärvi čállá, ahte ON attii sámiide skeaŋkka justa rivttes áigge.
Su mielas ON mearrádusat buktet sámiide ođđa fámuid joatkit dáisttaleami sámi iešmearrideami beales, ja ođđa doaivaga Suoma beale sámepolitihkkii.
