Ovttastuvvon Našuvnnat (ON) gohčču Norgga bissehit bieggamillohuksemiid Fovsen-Njaarkes
ON:a Nállevealahanlávdegoddi (CERD) ávžžuha mearrádusastis juovlamánu 10. beaivvi 2018 Norgga dalán bissehit bieggamillohuksemiid Åarjel Fovsen Sijte guohtuneatnamiin.
– Dát leat hirbmat buorit ođđasat, nanne Sámiráđi presideanta Åsa Larsson Blind preassadieđáhusas.
– Dát lea vuosttaš vuoitu min rahčamušain loahpalaččat bissehit bieggamillohuksemiid Fovsen-Njaarkes. Vuorddán ahte Norga dalán bearráigeahččá ahte huksenbarggut bissehuvvojit dassái go ON Nállevealahanlávdegoddi lea meannudan min váidaga ja loahpalaš mearrádus boahtá, lasiha son.
Beare stuora váikkuhusat
CERD lea ná mearridan maŋŋá go Sámiráđđi lea Åarjel Fovsen Sijte ovddas váidán Norgga Nállevealahanlávdegoddái ja čilgen mo bieggamillopárka váikkuhivččii Åarjel Fovsen Sijte boazodollui nu bahut ahte čuozašii siidda ja ovttaskas boazodoalli olmmošvuoigatvuođaide.
Mearrádus gieldit joatkit bieggamillopárkka huksemiid lea fámus dassái go CERD lea loahpalaččat meannudan ášši.
Sámiráđđi vuordá ahte Norgga ráđđehus doahttala ON:a mearrádusa ja bearráigeahččá ahte Fosen Vind dalán heaitá huksemis bieggamillopárkka.
