Ođđajágimánus galgá ON olmmošvuoigatvuođa ráđđi álgit guorahallat maid Ruoŧa ráđđehus lea dahkan oláhandihte gáibádusaid sámi rivttiid ektui.
Ruoŧa ráđđehus lea ovdanbuktán raportta Universal Periodic Review:ai, UPR, gos bagadallo mii lea buorránan ovddit guorahallama rájes mii čađahuvvui jagi 2015. Raporttas boahtá ovdán ahte ráđđehus dál bargá dan guvlui ahte ratifiseret ILO 169, álgoálbmot rivttiid konvenšuvdna.
– Mii leat bargame áššiin mii lea čadnon ILO 169:i. Muhto mis ii leat makkárge earenomáš guorahallan mii guoská ILO 169 juste dál, dadjá Ruoŧa demokratija-ja kultuvraministtára stáhtačálli Helene Öberg sverigesradio.se:ii.
