ON olmmošvuoigatvuohtakomitea dáhttu Ruoŧa ráđđehusa áŋgiruššat eanet sámi parlameantta ovddas, ja ahte davviriikkalaš sámekonvenšuvdna ollašuvvo.
ON olmmošvuoigatvuohtakomitea dáhttu Ruoŧa ráđđehusa áŋgiruššat eanet sámi parlameantta ovddas, ja ahte davviriikkalaš sámekonvenšuvdna ollašuvvo.
Eanet ruhta Sámediggái ja ahte davviriikkalaš sámekonvenšuvdna fargga ollašuvvo, dáid oaivvilda ON olmmošvuoigatvuohtakomitea leat dehálažžan vai Ruoŧŧa buorida sápmelaččaid dili, čállá oddasat.se.
Yuval Shany guhte lea miellahttu ON olmmošvuoigavuohtakomiteas, oaidná leat dehálažžan ahte Ruoŧa stáhta konsulteregoahtá sápmelaččaiguin:
– Min mielas berre Ruoŧŧa duođaid geahčadit iežaset dálá politihka ja lágaid sihkkarastin dihte ahte konsultašuvnnat vuhtiiváldet sámi beroštumiid ja sávaldagaid, lohká son.
Ruoŧŧa buoret go máŋga eará
Sámiid eananvuoigatvuođat lea ášši maid komitea lea ovdal moaitán, ja man ovddas fas moitet ráđđehusa. Shany dattege lohká Ruoŧa láhttet čábbábut go olu eará riikkat máilmmis.
– Obbalaččat dohkkehuvvo ahte sápmelaččain, dego joavku, lea iešmearridanvuoigatvuohta, dat lea eanet go maid eará riikkat leat mieđihan. Dattege ferte stáhta bidjat ruđaid dohko gos lea munni. Mun oaivvildan ahte fertejit biddjot eanet resurssat ja fertejit áŋgiruššat vai dát vuoigatvuođat ollašuvvojit.
