-Almmuhus-
-Almmuhus-
MAGASIIDNA Olusat serve doaluide

Olusat serve doaluide

-

-

Kárášjogas eai lean go golbma lieggaceahki ja čoaskadálki go miessemánu 17. beaivvi ráidu vázzilii girku luhtte otne, muhto čoaskadálki ii bissehan olbmuid ávvudeames beaivvi.

– Otná beaivvi lea mannan hui bures, vaikko lei veaháš čoaskadálki, ferte gárvodit dálkki mielde vai bivvá. Mun gal ledjen veaháš galbmon, čaimmiha Kárášjoga sátnejođiheaddji Anne Toril Eriksen Balto.

 

Árbevierru

Kárášjogas lea árbevierru ahte miessemánu 17. beaivvi ráidu bissána boares girku luhtte gos bidjet liđiid muitobácci lusa. Dán jagi lei sátnejođiheaddji ožžon veahki 9.-luohká oahppis Biret Inger Eiras.

 – Muitogeđggiin mii muittášit sin geat jápme nuppi máilmmisoađis, ja dorro dan ovddas ahte mis lea ráfi, friddjavuohta ja árvvut Norggas dál, muitala Balto.

 

Biret Inger Eira mielas lei gudni beassát bidjat liđiid muittobázzái.

 – Lei somá, lohká son.

 

Valáštallanviessus doalut

Ráidu bissánii maiddái boarrásiidguovddážis gos 9a-luohká nuorat adde rásiid ássiide. Das vázziledje viidáseappot Kárášjoga valáštallanvissui gos ledje ávvudoalut. Doppe ledje stohkosat mánáide ja ollesolbmot besse guldalit sártniid.

 

Russat

Russaid sártni bajilčála dán jagi lei «váldde gulul dat manná bures». Russaid presideanta Aigin Magnus Sarre lohká dán jagi ávvudemiid mannan bures, ja lohká iežaset leamašan šiegas russan.

 – Leamašan hui čoaskkis olles mánu, nu eat leat beassán ovdamearka dihte čáziin stoahkat. Mii leat leamašan hui šiegas russat, lohká son. Russat ledje oidnosis olles beaivvi Kárášjogas odne, mánáide stuorra iluin.

 

Geahča govaid Kárášjoga miessemánnu 17. beaivvi doaluin.

-Almmuhus-