Maŋemus vahkku leat earenomáš olu olbmot riŋgen korona diehtojuohkintelefovdnii.
Mannan vahkku riŋgeje sullii 10 000 olbmo korona diehtojuohkintelefovdnii. Go olusat riŋgeje, dat dagahii maid guhkes vuordináiggi.
– Álo go njoammun lassána ja go ođđa doaibmabijut biddjojit, de álget maiddái olbmot eambbo riŋget, muitala Dearvvašvuođadirektoráhta gulahallandirektevra Trine Melgård NRK:i.
Mannan vahkku duorastaga riŋgeje buot eanemus olbmot koronatelefovdnii, 2 500 olbmo.
– Olusat jerret errema birra. Ovdamearkka dihte gos sáhttá čađahit errema, muitala Melgård.
Go nu olusat riŋgejit, de lea maiddái guhkes vuordináigi. Mánnodaga lei gaskamearálaš vuordináigi 33 minuhta, ja dat guhkimus vuordináigi lei 2,5 diimmu.
(©NTB)
