– Dáhpáhuvvá nu olu Johkamohkis dán vahku. Ruoŧa gonagas boahtá, mii ávvudit Sámi álbmotbeaivvi ja de vel dánsut guokte beaivvi árbevirolaš sámedánssas mii lea lágiduvvon 1950-logu rájes dáppe.
Sylvia Blind lea fargga 20 jagi lágidan sámedánssa Johkamohki márkaniid oktavuođas. Su mielas lea árbevirolaš sámedánsa dat suohttaseamos dáhpáhus márkaniin ja son ávžžuha buohkaid boahtit dánsut sámedánsii.
– Mun jáhkán olusat leat gávdnan ráhkisvuođa dáppe, moddjá son. Váikko mii sáhttá geavvat dáppe sámedánssas. Dat lea earenomáš somá oaidnit go nu olu sámi nuorat čoahkkanit juohke guovllus ja leat čiŋadan nu čábbát, moddjá son. Dat leat juohke guovllu gávttit guovllus, holbbit nu šlivggodit. Dat lea vásáhus maid ferte vásihit, moddjá Blind.
Spagga dievva
Son muitala ahte sis láve spagga dievva dan guokte beaivvi go dánsa lágiduvvo. Dán jagi čuojaha Sančuari bearjadaga ja lávvordaga čuojaha fas DJ Article3.
Johkamohkki lea nu gasku nu bohtet sámit sihke oarjin ja nuortan.
– Min guossit háliidit gullat sámemusihkka go lea sámedánsa, ja danin mii leat válljen daid artisttaid. Muhto dat lea vuosttáš geardde guhkes áigái go Sančuari boahtá Johkamohkkái. Nu ahte dat lea somá. Maŋemus go sii čuojahedje dáppe lei 1999 muitala son.
Deaŧalaš ahte sámegiella gullo
Sylvia Blind mielas lea earenoamáš deaŧalaš ahte sámegiella gullo Johkamohki márkaniid oktavuođas ja sis leat juohke jagi leamaš sámi artisttat sámedánssas.
– Min hal eallit oalle ruoŧa servodagas ja sámedánsii bohtet nuorat miehtá sámi geain ii lea nu nana sámi biras. Danin lea hui deaŧalaš ahte besset gullat sámi musihkka sámegillii, čilge Blind.
Sámi álbmotbeaivi, Samernas ja márkanat
Johkamohkis ávvudit Sámi álbmotbeaivvi stuora muohtalávddis márkanbáikkis. Johkamohki sámesearvi leat mielde lágideami ja bohtet sámeskuvlla mánát lávlut ja dollojuvvojit sártnit, muitala Blind.
– Ruoŧa gonagas boahtá maid ávvudit Sámi álbmotbeaivvi. Dáppe mii ávvudit olles vahkkoloahpa. Ja de mun ávžžuhan olbmot maid vázzit márkaniin ja mannat Samernas skuvllas gos olu čeahpes duojárat vuvdet dujiid.
Sámit medias
Maŋŋel Girjas-duomu leat leamaš olu cielaheamit sámiid vuostá Ruoŧa mediain. Sylvia Blind mielas lea dat vel deaŧaleappot ahte sámit deaivvadit maŋŋel mii lea dáhpáhuvvan.
– Dat ii lea nu várálaš šat, dal orrot lodjon. Ja dal lea vel deaŧaleappot boahtit deike ja čájehit ahte mii sámit leat nannosat ovttas maŋŋel Girjas-duomu go lea leamaš nu olu čállojuvvon medias, dadjá Sylvia Blind.
– Dáppe dáhpáhuvvá nu olu go leat Johkamohki márkanat, muitala Johkamohki sámesearvvi jođiheaddji Sylvia Blind. Dáppe leat girjealmmuheamit, konsearttat ja duodječájáhusat. Ja de olu olbmot bohtet deike, sullii 50.000 gitta 70.000 olbmo lávejit juohke jagi fitnat dáppe márkanáigge.
