-Almmuhus-
-Almmuhus-
-Almmuhus-
OĐĐASATOlusat jo plánemin geasi luomo­stallan­mátkkiid

Olusat jo plánemin geasi luomo­stallan­mátkkiid

-

-

Virke Reiseliv ođđa iskkus čájeha ahte olusat navdet beassat boahtte geasi luomostallat olgoriikkas.

Guhtta logádasoasi norgalaččain plánejit luomostallat boahtte geasi, ja seamma olusat go ovdal leat plánemin mannat čakčalupmui, čájehit Virke Reiseliv ássiidiskkus.

Iskkus čájeha ahte koronaboahkuheapmi ja buoret mátkešluhttenvejolašvuođat dagahit ahte eambbosat oidnet vejolažžan boahtte geasi geasseluomu návddašit olgoriikkas. Olusat jáhkket njoammundili buorránit nu olu dán jagi, ahte lea vejolaš fas mátkkoštit olgoriikii. Jus eiseválddit eai gieldde dakkár mátkkiid, de jáhkkimis measta bealli sis geat boahtte geasi leat geasselupmui, mannet olgoriikii.

Spánia, Hellas, Ruoŧŧa ja Danmárku leat dat riikkat gosa eatnasat áiggošedje mátkkoštit. 

Luomostallat Norggas

Seammás lea nu ahte čieža logádasoassi norgalaččain jáhkket koronapandemiija váikkuhit maiddái boahtte geasi plánaide, ja eatnasat plánejit ge dan dihte Norggas luomostallat. 

– Mii illudat go nu olusat plánehit mátkkoštit sihke olgoriikkas ja maiddái iežamet riikkas 2021:s. Fitnodagaide lea dál dehálaš ceavzit dassái go aktivitehta lassána, ja galget ráhkkanit dan beaivái go olbmot fas mátkkoštišgohtet, dadjá Virke Reiseliv jođiheaddji Astrid Bergmål.

Vaikke Virke Reiseliv ođđa iskkus čájeha ge optimismma mátkkošteami dáfus, de dattege lea norgalaččaid luomostallanbušeahtta njiedjan 2020 rájes, dalle lei gaskamearálaš bušeahtta 43 050 ruvnno, dál ges 35 350 ruvnno juohke dállodoalus.

Dasa lassin dadjet maid 23 proseantta jerron olbmuin ahte sidjiide lea deháleabbo váldit luonddugáhttema ja birrasa vuhtii luomostallama oktavuođas, go ovdal pandemiija. 

(©NTB)

-Almmuhus-