Jus dus lea ođđajagilohpádussan eambbo lihkadit, ja áinnas olgoáimmus, de it leat áidna geas leat dakkár áigumušat.
71 proseantta norgalaččain háliidit lihkadit eambbo dán jagi. Dan čájeha iskkadeapmi man Ipsos lea čađahan Norsk Friluftsliv searvvi ovddas. Eatnasat sis háliidit eambbo váccašit luonddus dahje čuoigat. 61 proseantta vástidit ahte dán háliidit dávjjit dahkat.
— Ii leat imaš tuvravázzin lea norgalaččaid jiellat aktivitehta. Dat lea sihke nuvttá, sáhttá dahkkot vaikke goas ja dasa lassin luonddus lea buoret vásáhus ja dovdu, go siste guovlat muhtin hárjehallanguovddáža seinniide lášmmohaladettiin, lohká Bente Lier, guhte lea Norsk Friluftsliv generálačálli.
Iskkadeamis vástidit 41 proseantta ahte áigot eambbo lášmmohallat hárjehallanguovddážiin, 13 proseantta ges háliidit eambbo hárjehallat valáštallanšiljuin. Dat mearkkaša ahte olu eambbosat háliidit tuvrraide go hárjehallanguovddážiidda.
Lier oaivvilda loguid čájehit ahte jus háliida sihkkarastit ahte eambbo norgalaččat lihkadišgohtet, de lea dehálaš áŋgiruššat eambbo láhččit dili olgoaktivitehtaide.
— Mun háliidan rámidit ráđđehusa mii hástaleaddji dilis movttiidahttá min finadit luonddus, ja sávan sii oidnet dehálažžan áŋgiruššat olgostallandoaimmaid ovddas dán válgajagis mii dál álggii, dadjá Bente Lier.
