NAF dahje Norgga automobiila lihttu dieđiha preassadieđáhusas ahte Testfakta ja NAF-sihkkelstellegiid dárkkisteapmi čájeha ahte olu sihkkelstellegiid lea njulgestaga várálaš geavahit johtolagas.
Olu sihkkelstellagat mat leat vuovdimassii Norggas eai gierdda jos skirveha nuppe guvlui garvit juoidá dahje jus vuodjá man nu njeaiga 30 km/t.
– Mii fertet váruhit dáid váralaš sihkkelstellegiid vuostá. Lea hirpmahuhtti man unnán dat girdet ovdal go sihke sihkkelat ja sihkkelstellet luovvanit, lohká NAF geavaheaddjineavvu Anette Berve.
Iskan gávcci sihkkelstellega
NAF lea iskan gávcci sihkkelstellega mat galget goallosfaggái darvvihuvvot. Stellegaiid iskkadettiin iske man sihkkarat dat leat vuojedettiin, jus vuodjá man nu njeaiga, go čohkke dan ja gidde dan faggái.
Dušše okta dáid stellegiin birgii bures dáid geahččalemiin.
Eatnašiin beasihedje sihkkelat dahje sihkkelstellet eret goallosfakkis go iske mo manná jus boŋkkiha mainna nu oktii 30 km/t.
– Lea hirbmat duođalaš go ná olu sihkkelstellegiin lea nu heajos kvalitehta, ja mat fállojuvvojit geavaheddjiide. Lea hirbmat várálaš jus sihkkelstellet beasiha fakkis vuojedettiin dahje jus sihkkel ravgá eret, joatká Berve.
Iskama vuoiti lea Thule
Thule Easy Fold XT3 lea sihkkelstellegiid iskama vuoiti, mii cevzzii buot iskamiid.
Maiddái Biltema sihkkelstellet 34-297 cevzzii bures, muhto das lei heajut boŋkkihansihkarvuohta.
Iskama heajumus sihkkelstellegat ledje Julas Hamron ja Velova Bike Carrier 3.
NAF ja Testfakta fertejedje gaskkalduhttit golbma stelletiskama garvin dihtii menddo stuorra vahágiid biillaide ja sihkkeliidda.
– Mii leat dál gulahallamin dáid sihkkelstellegiid buvttadeddjiiguin dáid bohtosiid birra. Lea dehálaš ahte geavaheaddji sáhttá luohttit ahte buktagiid mat vuvdojuvvojit, sáhttá dorvvolaččat geavahit, lohká Berve.
Álki čohkket
Vuodjin- ja boŋkkihaniskamiid lassin, árvvoštallojuvvojedje maid man álki stellegiid lei čohkket, fakkastit biilii ja giddestit sihkkeliid gitta daidda. Heaŋgustellegiid lei álkimus geavahit, muhto guovtti stellega mielde eai čuvvon báttit maiguin giddesta sihkkela gitta.
Dát sihkkelstellegat ledje mielde iskamis Thule: Easy Fold XT3, Biltema: 34-297, Thule: Hang on Tilt 3, Jula: Hamron art.nr 609208, Yakima: Fold Click 3, Mekonomen: Carwise art.nr. 40-390853, Jula: Hamron art.nr 609209 ja Velova: Bike Carrier 3.
NAF rávvagat sutnje gii áigu oastit ja geavahit sihkkelstellega:
* Oaste nu stuorra sihkkelstellega vai šiehtadat buot sihkkeliid fievrredit maid áiggot ja sihkkelšlája.
* Muitte goallosfakki losimus deattu. Man olu gierdá dat, gease eret sihkkelstelletdeattu – de oaččut vástádusa man olu deattu don sáhtát dasa velá bidjat.
* Loga sihkkelstellega čohkkenrávvaga.
* Fuolat ahte stellet lea bures darvvihuvvon faggái nu ahte ii šlimppo ii veahášge.
* Gidde sihkkeliid bures. Jus báttit mat čuvvot stellega, eai leat doarvái, oastte liige báttiid.
* Vuoje dássidit – erenoamážit mohkiin. Muitte biillas lea liige deaddu ja go biila lea guhkit go dábálaš, de sáhttet biilla vuodjiniešvuođat rievdat.
