Dál váilu juohke goalmmat matematihkkaoahpaheaddjis Finnmárkkus doarvái čiekŋudeapmi. Seamma váilevašvuohta eaŋgalasgieloahpaheddjiin.
Dál váilu juohke goalmmat matematihkkaoahpaheaddjis Finnmárkkus doarvái čiekŋudeapmi. Seamma váilevašvuohta eaŋgalasgieloahpaheddjiin.
– Oahpaheddjiide, geain nanu fágalaš gelbbolašvuohta, lea dárbu jus oahppit galget oahppat eambbo. Mis leat olu čeahpes oahpaheaddjit, muhto oallugiin váilu čiekŋudeapmi dan fágas man oahpahit. Dál sávan ahte ohcet, dadjá oahppo- ja integrerenministtar Jan Tore Sanner preasasdieđáhusas.
201 matematihkkaoahpaheaddjis váilu čiekŋudeapmi
2025:s, borgemánu 1. beaivvi rájes, gáibiduvvojit ahte buot oahpaheddjin, geat galget oahpahit matematihka, eaŋgalasgiela, dárogiela, dárogiel giehtagiela ja sámegiela mánáidskuvllas, galget unnimus 30 oahppočuoggá dain fágain. Oahpaheddjin nuoraidskuvlladásis gáibiduvvojit unnimusat 60 oahppočuoggá oahpahit daid seamma fágaid.
Olu oahpaheaddjit Finnmárkkus dárbbahit lassioahpu ovdal 2025. Dál váilu 201 matematihkkaoahpaheaddjis, 165 eaŋgalasgieloahpaheaddjis ja 201 dárogieloahpaheaddjis fylkkas doarvai čiekŋudeapmi, Oahppodirektoráhta loguid vuođul.
Dilálašvuohta lea iešguđetlágan suohkanis suohkanii. Earret eará váilu 63 proseantta matematihkkaoahpaheddjin čiekŋudeapmi Bearalvágis, 50 proseantta Guovdageainnus ja 36 proseantta Hámmárfeastas, iige oktage Várggáin.
Suohkanis lea ovddasvástadus
Skuvllain ja suohkaniin lea ovddasvástadus ahte oahpaheaddjit, geat oahpahit dárogielas, matematihkas ja eaŋgalasgielas, ollašuhttet gelbbolašvuođagáibádusaid. Diibmá ožžo 205 oahpaheaddji 300 ohccis lassioahppofálaldaga Finnmárkkus.
– Mii vuordit ahte buot suohkanat leat kárten dárbbu lassiohppui iežaset skuvllain, ja ahte leat ráhkadan guhkesáigásaš plána movt galget ollašuhttit gelbbolašvuođagáibadusaid. Báikkalaš politihkkarat fertejit vuoruhit lassioahpu 2018:s ja ovddos guvlui, dadjá Sanner.
