Olu gelddolaš artisttat

Vihtta ođđa artistta leat gergosat Gállogietti lávdái ráppain, punkrockain, poprockain, elektronikain ja luđiin: Ailu Valle, Max Mackhé, Ivvár, Ylva ja Sara Ajnnak. Dat ollašuhttet lávdeprográmma, mas earret namuhuvvon artisttaid leat gelddolaš namat nu go Jon Henrik Fjällgren, Sofia Jannok, Kitok, Max Mackhé ja Niillas Holmberg. Muđui lea gehččiin stuorra válljenmunni iešguđetlágan dáidda- ja kulturvásáhusaid gaskka. Diŋgojuvvon buvtta, muitalusat, girjeságastallan dollagáttis, sámi musihkkahistorjá, tuvravázzin ja vuosteceahkkeviehkangilvu, sálmmat ja piánoimprovisašuvdna, Ruošša beale Sámi dánsun, ja meahcci mii hirpmahuhttá ja nu ollu eanet.

Sámi vuoigatvuođagižžu

Sámi vuoigatvuođagižžu ja Sámi sisabahkkemiid vuostálastin lea fáddá mii čuovvu máŋga artistta ja dáiddára dán jagáš prográmmas. Lea anonyma dáiddár- ja aktivistajoavku Suohpanterror mii lean dán jagi Márkomeannu vuosehusa duohken, geahččit vásihit ČSV, suohtastallama ja sevdnjes duohtavuođa propagándaplakáhtain. Artisttat nu go Sofia Jannok, Max Mackhé ja Niillas Holmberg leat nannosit čalmmustahttán iežaset sámi vuoigatvuođaid giččus iežaset musihkain ja dáidagiin. Holmbergain deaivvadit ge geahččit sihke kulturmeahcis, girjeságastallamis ja oassin Ylva-joavkkus.

Olles Sápmi – buohkaide

Dán jagáš prográmmas leat sihke Norgga, Ruoŧa, Suoma ja Ruošša beale Sámi artisttat ja dáiddárat.

– Márkomeannu galgá leat olles Sámi festivála ja mii galgat ovdanbuktit artisttaid ja dáiddáriid miehtá Sámis. Mii leat hui ilus go ohpihii dan nagodat. Prográmma lea maid dáiddalaččat hui máŋggabealat. Sihke dat nuorra, čaffadis sápmelaččat, sii guđet háliidit vásihit sámi dáidaga ja kultuvrra, sii guđet háliidit oahppat ustibiidáset kultuvrra birra ja mánnábearrašat loktet dán jagáš Márkomeanus, dadjá Marita Kristin Eilertsen preassadieđáhusa bokte.

Márkomeannu 2015 lágiduvvo duorastaga suoidnemánu 23. beaivvis lávvardaga suoidnemánu 25. beaivái.