Dasa lassin ožžo politiijat dieđu sisagaikuma birra Ságat aviissa doaimmahusas Kárášjogas.
Dasa lassin ožžo politiijat dieđu sisagaikuma birra Ságat aviissa doaimmahusas Kárášjogas.
Diibmu 05:10 sotnabeaivvi čuovganeapmái ožžo politiijat dieđu sisagaikuma birra Ságat doaimmahusvisttit Kárášjogas.
– Politiijat manne báikái, muhto čájehuvvui ahte ledje bargit geat ledje fitnamin doaimmahusas, čállet Nuorta-Finnmárkku politiijat Twitteris.
Bidjui butkái
Nuorta-Finnmárkku politiijain leamaš olu bargu mannan ija gárren olbmuid geažil. Kárášjogas dieđihuvvo ahte muhtin juhkan hoteallaguossi nággii ja diggui, son lei guođđán báikki go politiijat ollejedje hotellii. Kárášjogas lágiduvvui BeskánLuossaRock ikte, muhtin festiválaguossi gal juhkaluvai menddo sakka.
– Badjel 40-jahkásaš dievdu dolvojuvvui vuos dearvvašvuođaguovddážii iskkadeapmái, dan maŋŋel ges butkái gos lea idjadan, muitalit politiijat.
Bissehedje feasttaid
Sihke Girkonjárggas, Báhcavuonas ja Unjárggas šadde politiijat bissehit priváhtafeasttaid go musihkka čuojahuvvui menddo jitnosit. Girkonjárggas šadde politiijat maiddái sáhtostit olbmuid ruoktot, guovttis leigga badjelmeare juhkan, eaba ge deaivan ieža ruoktot.
Áššáskuhtton bearašveahkaválddálašvuođas
Badjel 40-jahkásaš dievdu lea Čáhcesullos áššáskuhtton bearašveahkaválddálašvuođas.
– Dievdu dolvojuvvui giddagassii. Politiijat dutket ášši, dieđihit Nuorta-Finnmárkku politiijaguovllus Twitteris.
Jáhke olbmo gahččan merrii
Váile diibmu 03:00 ballagohte ahte soames lea gahččan merrii Čáhcesullo gávpotguovddážis. Politiijat, ambulánsa ja buollinčaskadeaddjit manne báikái, muhto čájehuvvui ahte diehtu politiijaide ii doallan deaivása. Ášši loahpahuvvui.
Vudje beare leahttus
Mannan ija doalai johtolatpolitiija bearráigeahču Čáhcesullos. Báikkis gos lea lohpi vuodjit 70 kilomehtera diimmus, vudje viđas beare jođánit ja sii sáhkohalle.
– Gáŋgaviikkas ges bissehedje politiijat muhtin biilavuoddji geas ii lean biilavuodjinkoarta, dán ášši dutket politiijat, dieđihuvvo Twitteris.
Guovttis váldon narkotihkain
Čáhcesullos váldui muhtin gitta go lea rihkkon narkotihkalága, son beasai luovos maŋŋel dutkama. Maiddái Oarje-Finnmárkku politiijaguovllus dieđihuvvo narkotihkageavaheami birra.
– Álttás váidojuvvo muhtin go galgá leat geavahan narkotihka muhtin feasttas, dieđihit politiijat.
