-Almmuhus-
OĐĐASAT Olu diggeáššit leat maŋiduvvon

Olu diggeáššit leat maŋiduvvon

-

-

Olu diggeáššit Sis-Finnmárkku diggegottis leat maŋiduvvon eastadan dihte Covid-19 njoammudávdda.

Sis-Finnmárkku diggegotti sundi Finn-Arne Schanche Selfors dieđiha preassadieđáhusa bokte ahte fertejit olu diggečoahkkimiid maŋidit Covid-19 njoammudávdda dihtii.  Oassehasaide geaidda dát guoská sáhttá dat lea sihke vahát ja eahpesávahahtti.

– Diggegoddi dáhttu dánin heivehit dili nu ahte eanaš áššiid sáhttet meannudit, seammás go váldit vuhtii njoammuvára ja ovttaskas olbmo riektesihkarvuođa. Soames áššešlájaid fertejit meannudit main heagga-, dearvvašvuođa- ja eará servodatberoštumit váldojit vuhtii.

– Dát guoská earret eará áššiide main áššemeannudanmaŋideapmi sáhttá mielddisbuktit vára mánáid fuolaheamis, dadjá sundi Finn-Arne Schanche Selfors. 

Gáiddusčoahkkimat

Njoammuvára ektui de čađahuvvojit ollu áššit gáiddusčoahkkimiid bokte. Dat mielddisbuktá ahte buot dahje muhtun aktevrrat oasálastet gáiddusčoahkkima bokte, nu go neahttalogana bokte.

– Árvaluvvon láhkaásahus «Koronaláhka» diktá dakkárlágan gáidduscoahkkimiid. Diggegoddi čađaha danin eanet gáiddusčoahkkimiid ovttasráđiid ášši oassehasain ja advokáhtain, nu ahte buoremus lági mielde váldit vuhtii njoammuvara ja dárbbu čađahit diggečoahkkimiid, joatká sundi Finn-Arne Schanche Selfors.

Maŋideapmi dáid áššiide

Njoammuvára vuhtii váldima ektui de fertet liikká maŋidit máŋga čoahkkima. Dat guoská áššiide main maŋideapmi ii čuoza heggii ja dearvvašvuhtii, ja main leat ollu aktevrrat mat riektesihkarvuođa olis fertejit leat fysalaččat diggelanjas, seammás go johtingaskkat dahket váttisvuođaid.

- Advertisement -
-Almmuhus-