Eurohpá olmmošvuoigatvuođaduopmostuollu galgá gieđahallat ášši Sárevuomi čearu ja Norgga stáhta gaskkas.
Norgga stáhta ii háliit soabadit ekonomalaš buhtadusa Sárevuomi čearuin maid leat gáibidan Norgga stáhtas, muitala Sámerádion odne, juovlamánu 21. beaivvi.
Sárevuomi čearru vuittii Norgga stáhta vuostá duomus suoidnemánus 2021 Norgga Alimusrievttis. Čearru oaččui rievtti doaimmahit boazodoalu iežaset árbevirolaš eatnamiin Álddesjávrri guovllus Norgga bealde.
Maŋŋá duomu čearru mearridii čoahkkimis borgemánu 2021 váidit Alimusrievtti duomu Eurohpá olmmošvuoigatvuođaduopmustullui go eai ožžon buhtadusa massán guohtuneatnamiid ovddas. Čearru šattai maiddái máksit sin oasi Alimusrievtti diggegoluin. Danin guoddaledje ášši alit instánsii.
Eurohpá olmmošvuoigatvuođaduopmostuollu lea dohkkehan čearu váidima ja lea addán Norgga stáhtii ja čerrui vejolašvuođa soabadit ovdal go ášši manná viidásit duopmostullui.
Sárevuomi čearru stevdnii Norgga stáhta 2018:s. Vaikko leat vuoitán Norgga Alimusrievttis, de ášši galgá meannuduvvot Europá olmmošvuoigatvuođaduopmostuolus buhtadusa olis.
