-Almmuhus-
-Almmuhus-
OĐĐASAT– Olmmoš sáhttá jáhkkit ahte gierdá visot, muhto vásihit huša guhkit áiggi...

– Olmmoš sáhttá jáhkkit ahte gierdá visot, muhto vásihit huša guhkit áiggi čuohcá olbmui

-

-

Makkár dárbbut leat boazoealáhusas go čájehuvvo ahte lea duohta roassu, das dárbbaša Davvi Dearvvašvuođa bálvalus gulahallat boazoealáhusain. 

Davvi Dearvvašvuođas lei sáhkavuorru Norgga Boazosápmelaččaid Riikkasearvvi riikačoahkkimis odne (bearjadaga). Mannan dálvvi lei boazodoalus erenomáš garra  guohtonroassu ja eanaš boazosápmelaččat  šadde guođuhit ja  biebmat ealuideaset birra jándora. Garra dálvi lea čuohcan garrasit psyhkalaččat olusiidda. Davvi Dearvvašvuođa erenomášráđđeaddi Tone Amundsen muitalii makkár fálaldat sis lea veahkehit boazoealáhusa heahtedilis. Dattetge deattuhuvvo ahte lea dehálaš ahte boazoealáhus muitala makkár dárbbut čuožžilit go roassu deaivida.

– Dan maid mun oainnán maid mii sáhttit lea hállat boazoealáhusa birra sihke  departemeantta olis ja maid deattuhit almmolaččat ahte boazoealáhus lea heahtedilis. Diehtojuohkin lea hui dehálaš, go dál lea dehálaš gulahallat ealáhusain ja gullat makkár dárbbut sis lea ja maid mii sáhttit fállat, lohká Tone Amundsen. 

Čuohcá loahpas olbmui

Son deattuha ahte nu go buot eará olbmuin, de lea maid boazosápmelaččain psyhkalaš dearvvašvuohta.

– Mii diehtit ovdamearkka dihtii ahte dálkkádatroassu ii leat oanehis áiggi váttisvuohta, dat bistá máŋggaid jagiid, ja nu oainnán dárbbu doaimmaide mat sáhttet guhkit áiggi doaibmat. Mii diehtit ahte boazoealáhusas leat olu hástalusat ja rahčamušat. Olmmoš sáhttá jáhkkit ahte gierdá vissot, muhto vásihit huša guhkit áigge čuohcá olbmui. Boazosápmelaš lea barggus birrajándora, ja lea olu mii vuorjá. Eai dušše sisabahkkemat ja HMS, muhto maiddái ekonomalaš bealit čuhcet. Dieđusge go visot dán bidjá oktii, de dieđusge dahká juoidá olbmuin ja bearrašiin. Okta oassi lea ahte fysalaččat lea lossat, muhto psyhkalaččat maid čuohcá. Ii dušše čuoza eaŋkilolbmui, muhto olles bearrašii, go mii diehtit ahte boazoealáhus lea bearašealáhus, dadjá Amundsen. 

Olmmoš loahpas buohccá

Tone Amundsen lohká leat veadjemeahttuminn eallit dakkár garra dilis guhkit áigge. 

– Olmmoš loahpaloahpas buohccá, ja dalle lea dehálaš ahte mis lea fálaldat mii duste boazoealáhusa, lohká Toril Amundsen. 

Uhcán ohcet veahki

Davvi Dearvvašvuohta bivdá ge Norgga Boazosápmelaččaid Riikkasearvvi (NBR) smiehttat mo sáhttet SÁNAG ja Davvi Dearvvašvuohta láhčit bálvalusa buorebut vai sii olahit ja sáhttet veahkehit boazosápmelaččaid geat dárbbašit veahki. 

– Dat maid mii vásihit lea ahte boazosápmelaččat hui uhcán ohcalit veahki. Danin lea buorre go bovdejit min dakkár sajiide gos boazosápmelaččat leat čoahkkanan, lohká SÁNAG  jándor- ja sorjjasvuođaossodaga ovttadatjođiheaddji Ellen Ingrid Eira.

Rabasvuohta dehálaš

Ellen Ingrid Eira lea ieš boazosápmelaš ja dovdá ealáhusa siskkáldasat. 

– Mii galggašeimmet ollu rahpaseappot muitalit psyhkalaš dearvvašvuođa birra. Ii galgga šaddat čiegus áššin, nu ahte olbmot eai duostta ohcat veahki. Deháleamoš lea rabasvuohta. Boazosápmelaččas han lea maid psyhkalaš dearvvašvuohta nu go buot eará olbmuin. Dávjá lea nu go muđui servodagas, de ferte boazosápmelaš rumašlaš dearvvašvuođa eambbo dikšut, dadjá Ellen Ingrid Eira. 

Fálaldat ferte heivehuvvot

Ellen  Ingrid Eira lohká hui čielggasin ahte buot deháleamos lea gelbbolašvuohta, ahte dearvvašvuođabálvalusas lea gelbbolašvuohta boazoealáhusa birra. 

– Fálaldat ferte heivehuvvot boazosápmelažžii, dadjá son. 

-Almmuhus-