Buollinhoavda ávžžuha olbmuid riŋget heahteveahkkái jus doddjo jávrái, muhto ipmirda ahte olbmot ieža válljejit veahkehit.
Buollinhoavda ávžžuha olbmuid riŋget heahteveahkkái jus doddjo jávrái, muhto ipmirda ahte olbmot ieža válljejit veahkehit.
Ikte doddjui beana rašes jieŋas ja heavvanii Guovdageainnus. Priváhta olbmot geahčaledje gádjut beatnaga, muhto eai ollen áiggil ja beana vuojui. Gažaldat mii maŋŋil čuožžila lea jus olmmoš, ovdamearkka dihte mánná, livččii mannan čađa jieŋa.
Ovttasbargu
Guovdageainnu suohkana buollinhoavda Nikken Turi lohká go lihkohisvuođat čuožžilit, de lea vuosttažettiin dehálaš ahte olbmot dieđihit heahtenummariidda.
– Jus olmmoš manná čađa jieŋa, de ferte riŋget 110, mii lea buollinčáskadeami heahtenummar, ja doppe de gohččot min olggos gádjumii. Mis ii leat alddiineamet fanas dákkár gádjumiidda, muhto mis lea ovttasbargu Rukses Ruossain, ja sis lea fanas. Sin fanas lea min luhtte, nu ahte jus mis lea dárbu dasa, de eat ádján dan váldet fárrui, lohká Turi,
Gelbbolašvuohta
Turi lohká juste dákkár gádjumiidda, nu go heajos jieŋas doddjot, de lea Rukses Ruossas eanet rusttegat ja gelbbolašvuohta.
– Sis lea earret eará buokči, ja go buolašin galgá čáhcái, de ferte badjelis buokčibivttas.
Ieža gádjot
Turi, gii lea 15 jagi bargan buollinčáskadeaddjin, ii loga dan áiggis iežas vásihan ahte olmmoš lea doddjon jávrái. Manne dan ii leat vásihan lohká Turi ahte olbmot leat várrogasat, ja dan ahte earát birra veahkehit.
– Mun in jáhke ahte olbmot eai doddjo heajos jieŋaid geažil, muhto mun jáhkán olbmot leat hui čeahpit gádjut go soames doddjo, ja dat dagaha ahte min statistihkaide eai boađe dat logut, lohká Turi.
Árvvoštallat riskka
Turi lohká go olmmoš manná čađa jieŋa, de fertejit earát birra árvvoštallat riskka go áigot veahkehit.
– Mii olbmot leat dakkárat ahte mii gal háliidit veahkehit go earát leat heađis, muhto álo ferte árvvoštallat lea go alcces várálaš mannat jieŋa ala. Ii leat vejolaš dadjat movt lea rievttes vuohki láhttet go lihkohisvuohta deaivida, go juohke ášši lea iešguđetlágan. Jus lea hui heahti, de dieđusge sáhttá geahččat makkár veahkkeneavvut leat olámuttus, nu movt lea go báddi dahje muorra mainna sáhttá veahkehit jus olmmoš lea doddjon jávrái, lohká Turi.
