-Almmuhus-
-Almmuhus-
GUOIMMUHEAPMIOlmmáivákki oaggunfestiválas vuoittut masá 750 000 ruvnnu ovddas

Olmmáivákki oaggunfestiválas vuoittut masá 750 000 ruvnnu ovddas

-

-

Go Olmmáivákki oaggunfestivála lágiduvvo, de giktalit olbmuid oastit vurbbiid ja searvat oaggungilvvuide main leat stuora vuoittut. Sihke biila, skohter ja bassinvisti galget vuorbáduvvot ja oaggungilvvu vuitiide juhket ruhtalána. 

Olmmáivákkis, Gáivuona suohkanis lágiduvvo 26. oaggunfestivála dáid beivviid.

Odne lea mánáid várás oaggungilvu ja ihttin lágiduvvo váldooaggungilvu mas leat ruhtavuoittut 165 000 ruvnnu ovddas. 

– Oaggungilvvus sáhttá oažžut viehka buori kilohatti guoli ovddas jus dat dohppe. Son guhte goddá stuorámus guoli vuoitá oainnat 50 000 ruvnnu, ja mii diehtit ahte muhtin jagiid goddojuvvojit dušše smávva guolit, dadjá Olmmáivákki oaggunfestivála jođiheaddji Even Steinlien. 

Váldovuoiti lassin juhket 30 000 ruvnnu sutnje geas dohppe nubbin stuorámus guolli ja 25 000 ruvnnu sutnje gii goddá goalmmádin stuorámus guoli.

Njealjádin stuorámus guolli addá 15 000 ruvdnosaš vuoittu ja losimus luosa/dápmoha/rávddu ovddas oažžu 5000 ruvnnu. Buot logi gilvobáikkis skeŋkejit maiddái 2000, 1500 ja 500 ruvnnu sidjiide geat goddet golbma stuorámus guoli. 

 

Eaktodáhtolaš bargu

Olmmáivákki nuoraid valáštallansearvi dat lágida oaggunfestivála mii álggii gaskavahku. Oaggungilvvuid lassin leat sis doalut buot ahkásaččaide, earret eará lágiduvvojit sihkkelgilvvut, viehkamat, biilabingo ja dánssat. 

– Mis lea hirbmat hušas áigodat ja buohkat barget maid nákcejit. Dáppe leat sihke áhkut ja ádját, váhnemat, siesát ja ednot ja maiddái oahppásat geat áŋgiruššet doarjun dihte valáštallansearvvi. Lea dieđusge hirbmat olu bargu lágidit stuora festivála, muhto seammás eat dárbbaš smávit doaluid lágidit birrajagi. Dalle go mun ledjen unni, de muittán ahte eadni ja áhčči gárttaiga juohke nuppi vahkkoloahpa searvat eaktodáhtolaš bargguide valáštallansearvvi ovddas, čilge Steinlien. 

Olmmáivákki oaggunfestivála ii livčče ceavzán eaktodáhtolaččaid haga, muhto maiddái ruhtadeaddjit leat dehálaččat festiválii. 

– Lea garra gižžu oažžu sponsoriid, nu ahte mii bargat garrasit vai nagodit doalahit sin ja dasa lassin oažžut ođđa ruhtadeddjiid. Sis beassat oastit stuora vuoittuid hirbmat hálbái ja sii dat skeŋkejit ruhtavuoittuid oaggungilvvuide, muitala festiválajođiheaddji. 

 

Vuorbbit

Golbma mánu leat lágideaddjit, eaktodáhtolaččat ja fitnodagat vuovdán Olmmáivákki oaggunfestivála vurbbiid.

Váldovuoittut leat biila, skohter ja bassinvisti. 

– Mis leat vuorbevuoittut 583 000 ruvnnu ovddas ja dat soaitá maid dárbbašlaš vai nagodit vuovdit olu vurbbiid ja giktalit olbmuid boahtit oaggunfestiválii. Vurbbiid jođihit miehtá Norgga ja maiddái Suomas ja Ruoŧas. Mii vuovdit erenomáš olu vurbbiid Guovdageainnus ja Álttás. Midjiide lea hirbmat mávssolaš ahte olbmot dorjot valáštallanjoavkku, lohká Olmmáivákki oaggunfestivála jođiheaddji Even Steinlien ja sávvá olbmuide bures boahtima doaluide.

– Loadda lea maiddái sisamáksin oaggungilvvuide, nu ahte doaivut oallugiid boahtit Olmmáivággái. Sávvat maiddái ahte lea fiertu vahkkoloahpas ja ahte valáštallansearvi dine oaggunfestiválain nu go jo dahkat juohke jagi, loahpaha son. 

-Almmuhus-