Boahtte vahkkus lágiduvvo Olmmáivákki oaggunfestivála 25. geardde, ja dan ávvudit stuora biilavuoittuin.
Boahtte vahkkus lágiduvvo Olmmáivákki oaggunfestivála 25. geardde, ja dan ávvudit stuora biilavuoittuin.
Olmmáivákki oaggunfestivála vuovdá lottaid ovdagihtii ja dáhpin lea vuorbádit biilla.
– Dál, go oaggunfestivála ávvuda 25 jagi beaivvi, de lea vuoitun stuorát biila go ovddit jagiid. Váldovuoittuid searvvis lea maid fanas ja bassinbarta, lohká festiválajođiheaddji Helge Vatne.
Olmmáivákki oaggunfestivála áigumuš lea vuovdit 6000 vuorbbi. Vuoittuid árvu lea oktiibuot 619 600 ruvnnu. Váldovuoitu lea Peugeot Allure biila man árvu lea 361 400 ruvnnu.
Govven: Catrine Vatne
Oaggungilvvut
Olmmáivákki oaggunfestivála lágiduvvo geassemánu 26. beaivvis suoidnemánu 1. beaivái Gáivuona suohkanis.
Gaskavahkku leat oaggungilvvut mánáid várás ja lávvardaga fas ollesolbmuide.
– Oaggunfestivála galledit sihke davvi-romsalaččat ja finnmárkulaččat. Olmmáivággái bohtet sullii 1000 olbmo oaggunfestivála vahkkus. Erenomáš olu guovdageaidnulaččat čájehit beroštumi oaggunfestiválii ja sii ostet maid vurbbiid viššalit. Dávjjimusat vuitet davvi-romsalaččat váldovuoittu, muhto maiddái Guovdageainnus leat fasken biilavuoittu, dadjá Vatne.
Ruhtada valáštallama
Olmmáivákki nuoraid- ja valáštallansearvi lágida oaggunfestivála.
– Oaggunfestivála lea hirbmat dehálaš valáštallansearvái go dat ruhtada doaimma olles jagi. Mánát ja nuorat besset valáštallat taekwondo, spábbačiekčama ja čuoigama. Dán dietnasa haga ii livčče valáštallansearvi birgen, dadjá Olmmáivákki oaggunfestivála jođiheaddji Helge Vatne.
Eará aktivitehtat
Go lea valáštallansearvi mii lágida oaggunfestivála, de lea maiddái lunddolaš fállat eará aktivitehtaid mat hástalit olbmuid lihkadit.
Maŋŋebárgga lágiduvvo spábbačiekčancupa mánáid várás ja buot ahkásaččaide lágiduvvo sihkkelastin duorastaga ja meahcceviehkamat bearjadaga. Skáiddivázzimat fas loahpahit oaggunfestivála sotnabeaivvi.
– Lea dehálaš fállat aktivitehtaid buot ahkásaččaide, ja vásihit ahte olbmot servet dáidda. Stuorámus hástalus oaggunfestivála oktavuođas lea oažžut doarvái
eaktodáhtolaččaid. Olmmáivággilaččat leat viššalat, muhto lea viehka olu bargu go lágida ná
stuora doaluid, lohká Vatne.
Bearjadaga lágiduvvo maid biilabingo ja festiválafeasta.
Stand-up hervvoštalli Arnt Hjalmar ja Elvis boahtiba ja Hallvard Lyshaug guoimmuha musihkain.
Lávvardaga lea festiválafeasta Davvi Álbmogiid guovddážis, Ottar «Big Hand» Johansen ja Casino Steel čuojaheaba.
