Stuora oassi doaimmashehttejuvvon olbmuin leat váttisvuođat geavahit áppaid, neahttasiidduid ja digitála čovdosiid.
Beaivválaš earániid sáhttá lea váttis doaimmahit. Lea čieža jagi áigi go ođđa njuolggadusat universála hámi ektui álge doaibmat, muhto leat ain ollu digitála čovdosat maid lea váttis geavahit.
– IKT-čoavddus maid buohkat eai sáhte geavahit, lea heajos čoavddus sihke geavaheddjiide ja servvodahkii. Koronaáiggi lea vel ain deháleappot go goassege ovdal ahte teknologiija heive buohkaide, lohká Digitaliserendirektoráhta universála hámi bearráigeahču direktevra Malin Rygg.
Bearráigeahčču lea ráhkadan raportta mas boahtá ovdan ahte čalmmeheames olbmuin ii leat vejolašvuohta geavahit áppa mas koronanjoammun gozihuvvo.
Hehttehussan ollugiidda
Eai leat dušše olbmot geain leat bistevaš hehttehusat doaibmama ektui geat vásihit hehttehusaid, muhto maiddái sii geat gaskaboddosaččat eai sáhte doaimmahit beaivválaš doaimmaid, deattuha Rygg. Vuolši giehtasuonas ja eará giehtabávččas sáhttá leat dan mađe hehttehussan ahte ii nagot čuoggut telefovnna dahje dihtora.
Go šaddá vuorraset, de sáhttá oaidnu ja gullu hedjonit, ja muhtumiin sáhttet gieđat doarggistit dahje leat váttisin deaivat rievttes boalu unna mobiilašearpmažis.
Rygg lohká ahte leat olu čovdosat ja reaiddut maid leat váldán atnui, mat leat leamaš nu anolaččat ahte ávdnasat leat šaddan dábálaš geavahusreaidun buohkaide, nu go tv-boalloreaidu ja čáhcegeavja mas seamma boaluin válljet galbma ja liegga čázi.
(©NTB)
