-Almmuhus-
OĐĐASATOllugat áigot oahppat sáme­giela Málat­vuomis

Ollugat áigot oahppat sáme­giela Málat­vuomis

-

-

Sámediggeráđđi lea juolludan 148 000 ruvnno davvisámegiela álgokursii.

– Nuorat ja rávisolbmot Málatvuomis besset oahppat sámegiela, ja seammás oažžut máhtu sámi kultuvrras, dadjá sámediggeráđđi Mikkel Eskil Mikkelsen (NSR).

Málatvuomi suohkan háliida álggahit barggu sámi dimenšuvnna oainnusmahttimiin buoret vuogi mielde. Suohkanis leat juo dál sihke sámi álbmot, ásahusat, boazodoallu ja historjá gos sámi leahkin lea leamaš guhká. Dat duohtavuohta dahká ahte suohkan háliida eanet fokusii sámi fáttáid.

Sámegielkurssat

Málatvuomi suohkan áigu dan oktavuođas lágidit sámi giellakurssa 2021 giđa. Nuorain ja rávisolbmuin Málatvuomis galgá vejolašvuohta álgit sámegielkurssaide, ja oahppat sámi giela ja kultuvrra birra.

– Vai álbmot šattašii dihtomielalažžan gielas, ja soaitá sin sámi máttuid birra, de háliida suohkan čađahit kurssa easkkaálgiide, muitala sámediggeráđđi Mikkel Eskil Mikkelsen (NSR). Suohkan lea ovdagihtii iskan lea go beroštupmi danlágan kursii, ja otnáš nammii leat lagabuidda 60 olbmo geat háliidit álgit sámi giellakursii. Dat illudahttá min Sámediggeráđis.

Eanaš gullet olahusjoavkui

Suohkan čállá ohcamisttis ahte sámi giella ja kultuvra ii leat nu dovddus Málatvuomis, ja vaikko gávdnojit olbmot geain leat sámi máttut, de lea ollugiin unnán máhttu giela ja kultuvrra birra. Sii dat eanaš gullet olahusjoavkun kursii.

– Sámediggeráđi mielas lea deaŧalaš ahte dollojuvvo sámegielkursa nuoraide ja rávisolbmuide, erenoamážit guovlluin gos sámegiella ii leat ovddežis nanus, dadjá sámediggeráđđi Mikkelsen. Sámegiella oažžu buoret stáhtusa go eambbogat ohppet giela, ja šaddet eanet sámegielagat servodagas. Váilevaš sámi giellagelbbolašvuohta lea dál váttisvuohtan buot servodatsurggiin. Danne lea deaŧalaš ahte eambbogat ohppet sámegiela ja ohppet sámi kultuvrra birra. Mii sávvat eanet kursaaktivitehta suohkanis, ja ahte dasa šattašii buorre joatkka, dadjá Mikkelsen loahpas.

Doarjja lea juolluduvvon ohcanvuđot doarjaga bokte Giellaprošeavttaide.

-Almmuhus-