-Almmuhus-
OĐĐASATOllu ruošša­luossa registrerejuvvon Finnmárkku jogain

Ollu ruošša­luossa registrerejuvvon Finnmárkku jogain

-

-

Moatti vahkus lea dieđihan ollu ruošša­luosaid Norgga jogain, ja stuorámus regi­streremat leat leamaš Finnmárkku jogain. Dát šládja lea vierisšlájaid čáhppeslistui merkejuvvon ja árvvoštallojuvvon leat «alla riska»-dásis.

Ruoššaluossa boahtá das go dat lea čáziide luitojuvvon Ruošša bealde, ja dat ii leat sávvojuvvon Norgga lundui, go das leat heajos váikkuhusat sihke lussii, dápmohii ja oppa ekovuogádahkii.

Dat mii namuhuvvo vejolaš negatiivva váikkuhussan lea ovdamearkka dihtii dávddat, parasihtat ja gilvaleapmi jogaluosa gođđosajiid alde.

 

Eanemus ruoššaluossa
Finnmárkku jogain leat dieđihan oaidnán eanemus ruoššaluosaid, ovdamearkka dihtii árvvoštallet buokčit ahte leat sullii 1200 ruoššaluossa Stuorrajogas.

 

Ávžžuhit dutkat dili veahkkálagaid
Finnmárkku fylkkagielda dieđiha ahte ain lea stuorra eahpesihkkarvuohta das mo ruoššaluossa váikkuha negatiivvalaččat eará guliide ja ekovuogádahkii.

Danne dutkit ávžžuhit buohkaid veahkehit dán barggus, sáddet sálašstatistihka ja dakkár dutkanmateriálaid nu mo čuopmaiskosiid ja govaid.

Dutkit gohččot maid olbmuid čollet guliid maid goddet ja iskkastit leat go gođđan, ja vel dárkkistit ahte lea go jápma ruoššaluosat jogain borgemánus ja čakčamánus.

 

Ávžžuhit álbmoga sáddet dieđuid
Finnmárkku fylkkagielda ávžžuha olbmuid sáddet dieđuid dutkiide.
– Mađe eanet dieđut sáddejuvvojit, dađe buoret vuođđu lea árvvoštallat váikkuhusaid, cealká Finnmárkku fylkkagielda.
Jus leat goddán ruoššaluosa, sáddes dieđu NINA dutkiide, sin neahttasiiddus gávnnat eanet dieđuid ruoššaluosa birra ja makkár dieđuid galggat sáddet sisa.

 

-Almmuhus-