Norgga jođánisláddenstašuvnnain sáhttet badjel 900 elbiilla láddet oktanis, muhto dat ii leat doarvái garvit ráidduid stašuvnnain. Dan dihte galget dál huksejuvvot eanet láddenstašuvnnat, maiddái davvin.
Norgga jođánisláddenstašuvnnain sáhttet badjel 900 elbiilla láddet oktanis, muhto dat ii leat doarvái garvit ráidduid stašuvnnain. Dan dihte galget dál huksejuvvot eanet láddenstašuvnnat, maiddái davvin.
Sullii 50 proseantta dain geat oassálaste Norgga elbiillasearvvi iskosii, Elbilisten 2017, vástidedje ahte sii leat ráiddus vuordán jođánisláddenstašuvnnain juogo «dávjá» dahje «muhtomin».
Eanet beroštupmi
– Mii diehtit ahte jođánisláddenstašuvnnain mat leat guovddášsajiin lea ráidu duollet dálle. Danne leage dehálaš ahte eanet stašuvnnat huksejuvvojit, go eambbosat geavahišgohtet elbiillaid ja jođánisláddenstašuvnnaid. Seamma dehálaš lea ásahit jođánisláddenstašuvnnaid boaittobeale báikkiin, nu ahte elbiila sáhttá geavahuvvot juohke sajes, muitala váldočálli Christina Bu Norgga elbiillasearvvis.
– Min miellahtut muitalit ahte eai bala das ahte láddestašuvnnat eai leat olámuttus. Dán áigge ballet elbiilavuoddjit láddemis; danin eai duostta luohttit dasa ahte jođánisláddenstašuvnnain ii leat ráidu, muitala Bu.
Stuorát jođánisláddenstašuvnnat ja eanet áŋgiruššan smávva báikkiin
Nationála fievrredanplána 2018-2029 oktavuođas buvttii Norgga elbiilasearvi einnostusa man galle jođánisláddenstašuvnna galget huksejuvvot 2020 rádjai.
Jođánisláddenstašuvnnaid viiddideapmi, Enova ruhtadoarjagiin, sihkkarastá ahte skábmamánu leat jođánisláddenstašuvnnat juohke viđat miilla, daid deháleamos fievrredanruvttuid gaskal – vuosttažettiin máttabeale Romssa.
– Dát vuogádat dahká ahte elbiilavuoddji joavdá gosa áigu, nu guhká go ii hohpohala. Go láddenfierpmádat lea gárvvis, šaddá dehálažžan dan ges ovdánahttit eanet. Dat mearkkaša ahte šaddet stuorát jođánisláddenstašuvnnat. Lea maiddái dehálaš gávdnat buori čovdosa min davimus fylkii, Finnmárkui, muitala Bu.
Loahppa geassemánu šattai maid oahpes áššin ahte Enova almmuha doarjjaprográmma sin várás geat huksejit jođánisláddenstašuvnnaid boaittobeale báikkiide.
