Mannan vahkus ruosti buollašiid geažil ledje bissánan ruošša busset olggobeale Kárášjoga márkana. Kárášjoga politiijat ja eará veahkkebalvvat čovde váttisvuođa. Veahki ovddas ge leat ožžon ikte almmolaš reive ruošša fitnodagas giitosániiguin.
Mannan vahkus ruosti buollašiid geažil ledje bissánan ruošša busset olggobeale Kárášjoga márkana. Kárášjoga politiijat ja eará veahkkebalvvat čovde váttisvuođa. Veahki ovddas ge leat ožžon ikte almmolaš reive ruošša fitnodagas giitosániiguin.
– Ruoššat giitit veahki ovddas! Ii juohke beaivvi go ožžot dakkár, muhto mii atnit árvvus dán. Dát lea álo hávski veahkehit olbmuide beroškeahttá makkár riikagullevašvuohta olbmuin lea. Mii sávvat sii besse ávvudit juovllaid ruovttus Ruoššas, čállá Kárášjoga leansmánni Kjell Magne Grønnli reivvestis.
NRK Sápmi mannan vahkus dieđihii ja čájehii dasto Ođđasiin ahte 7 beaivvi dán mánu ruosti buollašiid geažil ledje bissánan eai ge vuolgán johtui ruošša busset olggobeale Kárášjoga márkana. Bussiin ledje 52 olbmo. Kárášjoga politiijat ovttas eará veahkkebalvvain šadde veahkehit olbmuide geat ledje bussiin.
Dat ledje ruošša ERIDAN ja TAURUS nammasaš guoleindustriijafitnodagaid mielbargit beassan ruosti buollašiid geažil bártái.
– Giitit Kárášjoga leansmánniid go veahkehedje fatnasiid mielbargiide go dát deaivvadedje gárra dálkkiin sin mátkkis ruoktot Murmánskii, Ruššii. Giitu din addálasvuođa ja liekkus váimmu ovddas. Mii sávvat didjiide buori dearvvašvuođa, buorredilálašvuođa ja lihkkostuvvoma, čállá Kárášjoga leansmánnekontuvrii virggálaččat Eridan ja Taurus guoleindustriijafitnodagaid bealis jođiheaddji Y. Parshev.
Giitosat buohkaide
Kárášjoga leansmánne Kjell Magne Grønnli oaivvilda dát giitosat gullet buohkaide geat ledje veahkehan busse sáhtolaččaide.
– Dát giitosánit eai leat dušše leansmánnekontuvrii Kárášjogas, muhto maiddái Kárášjoga gildii, Kárášjoga Taxi:i, Baltos Busser fitnodahkii, Kárášjoga ambulánsii ja buot earáide geat leat fállán iežaset veahki.
Ávvir geahččalii váldit oktavuođa Eridan ja Taurus fitnodagaiguin muhto ii lihkostuvvan.
