-Almmuhus-
-Almmuhus-
OĐĐASAT Ollu feasta­riedja ja doarrumat mannan ija

Ollu feasta­riedja ja doarrumat mannan ija

-

-

Finnmárkku politiijain lei ollu bargu ođđabeairuohta. Sihke Álttás ja Hámmárfeasttas šadde politiijat vuodjit ija bissehit feasttaid. 

Finnmárkku gávpogiin ledje nu olu feasttat ja riedja ođđabeairuohta ahte politiijat šadde vuodjit viesus vissui. Loggas ávžžuhedje de loahpas garrasit olbmuid mannat baicca nohkkat. 

Hámmárfeasttas:

Diibmu 02.12: Feastariedja muhtin priváhta čujuhusas ja politiijat manne báikái bissehit feastta. 

Diibmu 04.15: Politiijat manne priváhta orrunbáikái Hámmárfeastta guovddážis heaittihit feastta ja gohččo olbmuid mannat ruoktot.

Diibmu 04.20: Politiijat manne muhtin priváhta orrunbáikái viežžat nissona goalmmátlotjagiin go lei nu gárremiin, ja su dolvo de ruoktot. 

Čáhcesullos:

Diibmu 02.10: Politiijat manne muhtin priváhta orrunbáikái gos ledje nuorat dorron. Ovttas lei bátni dan geažil doddjon dahje beassan ja su dolvo doaktára lusa. Politiijat álggahit dás ášši. Buot nuorat dáppe ledje vuollel 20 jagi. 

Diibmu 03.10: Goalmmátlotjahkásaš dievdu váldui giddagassii go lei doaruhan nissonolbmo gávpotguovddážis. Dievdu lei gárremiin ja su vuostá álggahuvvo ášši dán dáhpáhusa olis. 

Álttás: 

Diibmu 01.15: Bođii diehtu ahte muhtin lea bávkalan boastagássa ođđabeaibávkkanasaiguin Joganjálmmis. Politiijat bohte báikái, muhto vearredahkki lei viehkalan báhtui. 

Diibmu 01.45: Diehtu politiijaide ahte nuorat bávkkuhit dollarusoniid priváhta viesu njeaiga Bossogohpis, muhto sii ledje mannan go politiijat ollejedje báikái. 

Diibmu 0150: Dievdu gii lei gárremin fáippui luoddadihkáin biillaid guvlui mat vudje E6 geainnus Buktaluohkás. Politiijat manne báikái ja gávdne dievddu gii ii diehtán riekta gos son lea, ja su veahkehedje de beassat ruoktot. 

Diibmu 03:30: Granshagen guovllus fertejedje politiijat heaittihit feastta go soames lei váidán rieja. Politiijat gevrejedje olbmuid mannat ruoktot. 

Diibmu 03.40: Joganjálmmis ledje doarrán muhtin priváhta čujuhusas Joganjálmmis. Goalmmátlotjahkásaš gii lei cápmahallan, lei mannan go politiijat ollejedje báikái, muhto su bivdet váidit ášši árgan. 

Diibmu 05.20 Politiijat manne Saga ássanguvlui feastarieja geažil, gos muhtin lei oivviin skoalkalan nuppi, goappašagat goalmmátlotjagiin ja gárremin. Su gean váruhit doaruhan nuppi, lei mannan báhtui, muhto politiijat álggahit dás ášši. 

Feastarieja oktavuođas lea muhtin nuorra olmmoš gahččan ja bávččagahttán oaivvi, ja son lei hirbmat gárremiin. Su dolvo politiijat doavtterbálvalussii vai gorro su hávi oaivvis. 

Girkonjárggas:

Diibmu 23.20: Bođii diehtu ahte muhtin lea báhčán ođđabeaibávkkanasaid tuneallas E105 geainnus, politiijat leamaš báikkis viežžame rusttegiid.

Diibmu 00.50: Politiijat heaittihit feastta gos ledje 35-40 nuora čoahkkanan muhtin ásodahkii. Soapmásat dáin ledje vuollel 18 jagi, ja politiijat váldet sin váhnemiiguin oktavuođa. Álggahit ášši su vuostá gean lea ásodat. 

-Almmuhus-