-Almmuhus-
-Almmuhus-
OĐĐASAT Ollu bohccobiergu biergovuorkkáin

Ollu bohccobiergu biergovuorkkáin

-

-

Dán čavčča leat eanet bohccuid njuovvan go guhkes áigái leat dahkan. Gaskamearálaš deaddu lea maid alibut.

Eanet njuovvan ja eanet deattut dagahit ahte bohccobiergu Norggas lea oažžumis dál.

Animalia-logut čájehit ahte skábmamánu loahpa rádjái ledje 51 100 bohcco njuvvon, ja diibmá ledje 44 000 bohcco seamma áiggis. Čakčat gárttai 1 145 tonna bohccobiergu maŋŋel njuovvamiid. Čakčamánus njuvvui eanemus dán jagi, ja golggotmánu ja skábmamánu logut leat seamma dásis go diibmá, čállá Eanandoallodirektoráhtta.

 

Njuovvandeaddu lassánan

Gaskamearálaš njuovvandeaddu lea 20,0 gilo, ja diibmá lei lohku 19,2 gilo seamma áiggis.

Miehtá riikka lea gaskamearálaš kvalitehta bohccobierggus buoret go lei diibmá.

Vuorkkáin lei 421 tonna biergu skábmamánu 1.beaivvi. Dat lea 144 tonna eanet go diibmá seamma áiggis. Dat leat sullii 7-8000 bohcco, go rehkenastá gaskamearálaš deattu 20 giloin.

 

Bures stivrejuvvon márkaniid guvlui

Bohccobierggu márkanlávdegotti jođiheaddji Jon Anders Lifjell, lea ilus go buvttaovdáneapmi lea bures stivrejuvvon márkaniid guvlui. Ođđa biebmoráhkadanneavvagat leat čalmmustahttán bohccobierggu ja buoridan jođu bohccobierggus.

– Eanet njuovvan dán čavčča lea dagahan ahte bohccobiergu lea álkit fitnet ovdalaš juovllaid, go guhkes áigái lea leamaš. Dat lea buorre mearka sidjiide geat háliidit bohccobierggu návddašit juovlabasiid ja ođđajagibasiid, dadjá Lifjell Eanandoallodirektoráhta neahttasiiddus.

- Advertisement -
-Almmuhus-