-Almmuhus-
OĐĐASATOlles­olbmuin váilu šleđggon

Olles­olbmuin váilu šleđggon

-

-

NAF muittuha ahte lea seamma dehálaš rávesolbmuide go mánáide geavahit šleđggona johtolagas.

NAF muittuha preassadieđáhusas ollesolbmuid sákkastit šleđggona biktasii dahje nahkehastit šleđggonliivva badjelii, vai oidnojit čakčaseavdnjadis. 

NAF gulahallanhoavda Camilla Ryste lohká váhnemat leat čeahpit fuolahit ahte mánáin leat šleđggonat go vulget skuvlii dahje mánáidgárdái, muhto go ieža vulget, báhcá šleđggon ruoktot. Šleđggon várra ii goasse čuovo mohta, muhto lea dehálaš muitit man uhcán don oidnot johtolagas šleđggona haga. 

– Erenoamážit go mánát du bálddas čuvget biilačuovggas ja ieš bázát measta oaidnemeahttumin čakčaseavdnjadis go ii leat šleđggon, lohká NAF gulahallanhoavda Camilla Ryste. 

Guovtti sekunddas fuomášit

Biilavuoddjis mii vuoddjá 50-km/d, oanehis vuodjinčuovggaiguin, lea dušše guokte sekundda áicanáigi ovdal fuomáša vázzi olbmo šleđggona haga. Jus dan olbmos livčče šleđggon, de lei biilavuoddji fuobmát su 150 mehter ovddabealde ja sus livčče logi sekundda garvináigi.

Bija gokko buoremusat báitá

Earret šleđggonliivva, de oidnojit buoremusat dábálaš šleđggonboalut ja šleđggonbáttit seavdnjadis.

– Gávpogis, gos vudjet oanehis vuodjinčuovggaiguin, lea buoremus darvvihit šleđggona seakkáža vulobeallái ja mánáin oaivvi rájes. Doppe gos vudjet guhkes vuodjinčuovggaiguin lea buoret darvvihit šleđggona badjelii vai oidno. Sihkkeliid ja mánáidvovnnaid ferte maid muitit merket šleđggoniiguin. Muitte ahte šleđggon berre maiddái oidnot sealggabealde, rávvejit sii.

-Almmuhus-