-Almmuhus-
-Almmuhus-
-Almmuhus-
OĐĐASAT– Olles NSR stivrenvuohki lea váttisvuohta

– Olles NSR stivrenvuohki lea váttisvuohta

-

-

– Ovddit háve go čuožžilii eahpeluohttámuš ráđđái, de gájuimet sin, muhto dál lea dilli stuorát ja váddásit, lohká Árjja parlamentáralaš jođiheaddji Laila Susanne Vars.

Árjja parlamentáralaš jođiheaddji Laila Susanne Vars ii čiegadan veaháš ge odne iežaset eahpeluohttámuša Norgga Sámiid Riikkasearvvi unnitlogu ráđđái.

Son lohká Árjja geahččalan addit NSR:i vejolašvuođa váldit oktavuođa, ii ge Vars loga eahpádusa ahte lea NSR ovdasvástádus váldit oktavuođa, iige sin.

– Mii eat lea álgovuorus dorjon NSR-ráđi, mii leimmet okta dain bellodagain geat jienasteimmet vuostá go ráđđi vuođđuduvvui, lohká Laila Susanne Vars.

Árja lei áidna presideantagilvaleaddji NSR:i, muhto Árja vuoittáhalai eanetlohkui dalle.

 

Dievasčoahkkin mearrida

Árja lea ge ovddidan molssaevttolaš bušeahttaevttohusa ovttas Olgešbellodagain ja Bargiidbellodagain.

Sámedikki dievasčoahkkimis lea dál boddu ja bušeahtta-ášši lea maŋiduvvon diibmu golmma rádjái.

Vars čilge jus NSR ii oaččo doarjaga iežaset bušeahttaevttohussii, de mearkkaša dat ahte sámediggepresideanta Aili Keskitalo ferte jearrat dievasčoahkkimis luohttámuša ahte son joatká presideantan ja stivre unnitlogus.

– De lea dievasčoahkkima duohken mearridit dorjot go NSR-ráđi vai eai. Nu lea parlamentarisma, presideanta galgá jearrat kabineahttagažaldaga, lohká Vars.

 

– NSR-ráđđi ii oro áddemin duođalašvuođa ja duohtavuođa. Mis lea molssaeaktu, eará presideanta ja Sámediggeráđđi mii sáhttá stivregoahtit Sámedikki jus NSR ii oaččo luohttevašvuođa odne. Mis ii leat luohttevašvuohta NSR:i, ii ge leat leamašan guhkes áigái, go leat hilgon ovttasbarggu ii ge leamašan gulahallan guhkes áigái, lohká Vars.

Gájui ovddit háve

Laila Susanne Vars lohká dalle mearridedje geahččalit ovttasbargat áššis áššái, muhto dađi bahábut lohká vásihan váttisvuođa ovttasbargat NSR:in.

– Ovddit háve, go čuožžilii eahpeluohttámuš ráđđái, de gájuimet sin, muhto dál lea stuorát ja váddásit dilli. Mun oaivvildan ahte olles NSR stivrenvuogi leat váttisvuohtan. Sii leat leamašan nu čeavlát, eai leat fitnan ge min ságain ohcat doarjaga áššiin eará go bággemiin, lohká Vars.

 

Ii boahtán ságaide

Árjja parlamentáralaš jođiheaddji lohká ahte mannan háve go eahpeluohttámuš ovddiduvvui ráđđái, de attii Árja vejolašvuođa NSR:i váldit sin mielde politihkalaš ovttasbargui.

– Mii fálaimet politihkalaš ovttasbarggu, mii lei ge maiddái eaktu go gájuimet sin dalle. NSR ii boahtán goassege min ságaide maŋŋá. Mii leat vuordán ja vuordán, muhto leat čađat ohcalan doarjaga Bargiidbellodagas. Mis ii leat luohttámuš NSR:i ja ráđđái, loahpaha Laila Susanne Vars.

-Almmuhus-