Karin Tuolja Johkamohkis eret Ruoŧas ja Jekaterina Mechkina Murmánskkas eret Ruoššas oažžuba Davviriikkaid Gollegiella giellabálkkašumi 2018:s, čállá Sámediggi preassadieđáhusas.
Sámediggi čállá ahte Karin Tuolja lea olles eallima bargan julevsámegielain Ruoŧa bealde.
Son lea bargan oahpaheaddjin, jorgaleaddjin, oahpponeavvoráhkadeaddjin ja korrekturlohkkin.
Tuolja lea hui guovddáš olmmoš Julevsámi giellabirrasis, ja lea leamaš hui deaŧalaš Norgga ja Ruoŧa gaskasaš giellaovttasbargui, earenoamážit sániid ja doahpagiid ovddideamis ja Biibala jorgaleamis.
Nuppi vuoiti birra čállá ahte Jekaterina Mechkina oažžu Gollegiela giellabálkkašumi danne go guhká lea bargan gielddasámegiela nannemiin Ruošša bealde.
Son lea leamaš mielde sátneriggodaga ja sierra gielddasámi sátnegirjji ovddidemiin. Mechkina lea čállán girjjiid, jorgalan girjjiid ja ráhkadan oahpponeavvuid.
Su girjjiiguin leat ollugat oahpásmuvvan Murmánska-guovllu gielddasámi eallimii ja kultuvrii.
Gávccát geardi
Gollegiella – Davviriikkaid sámi giellabálkkašupmi juhkkojuvvo gávccát geardde.
Giellabálkkašupmi galgá leat mielde ovddideamen, ovdánahttimin ja seailluheamen sámegielaid Norggas, Ruoŧas, Suomas ja Ruoššas.
Giellabálkkašupmi sáhttá addojuvvot ovttaskas olbmuide, organisašuvnnaide dahje ásahusaide mat leat garrasit áŋgiruššan sámegiela ovddidemiin.
Buorit ovdagovat
Preassadieđáhusas čuožžu ahte sámediggepresideanta Aili Keskitalo ja Gielda- ja ođasmahttindepartemeantta stáhtaráđđi Monica Mæland sávvaba lihku goappaš bálkkašupmevuitiide.
– Goappašat bálkkašupmevuoitit leaba buorit ovdagovat, ja leaba deaŧalaččat julev- ja gielddasámegiela nannemis, dadjá Gielda- ja ođasmahttindepartemeantta stáhtaráđđi Monica Mæland.
– Leat evttohuvvon máŋga buori evttohasa mat leat garrasit áŋgiruššan sámegielaid ovddas. Evttohasat gokčet buori muddui buot sámi giellaguovlluid, ja čájehit stuorra erohusaid ja govdodaga. Sihke organisašuvnnat ja ovttaskas olbmot, árbevirolaš ja ođđaáiggi giellaarenat leat nominerejuvvon ja árvvoštallojuvvon. Stuorra beroštupmi bálkkašupmái ja máŋga buori ja iešguđetlágan evttohasat addet jáhku sámegielaid boahtteáigái, dadjá sámediggepresideanta Aili Keskitalo.
Jurys leat leamas mielde Suoma beali Neeta Jääskö, Ruoŧa beali David Kroik, Ruošša beali Nina Afanasieva, ja Norgga beali Solvår Knutsen Turi ja Jane Juuso.
Bálkkašupmi geigejuvvo Karin Tuoljai guovvamánu 26. beaivvi Oslos, ja Jekaterina Mechkinai guovvamánu 29. beaivvi Murmánskkas.