Bådådjo sihkkelasti Torgeir Gamst Moen ollii vuosttažin Áltái dán jagi Onroad Finnmárkku gilvvus, ja su maŋábealde ledje golbma kárášjohkalačča.
Bådådjo sihkkelasti Torgeir Gamst Moen ollii vuosttažin Áltái dán jagi Onroad Finnmárkku gilvvus, ja su maŋábealde ledje golbma kárášjohkalačča.
444-gilvvu sihkkelastit ollejedje ovddemus Áltái lávvordaga dán jagi Onroad Finnmárkkus.
Torgeir Gamst Moen lei gii lei ovddemusas, ja kárášjohkalaččat Jonas Gulsrud, Magne Svineng ja Rune Fjellheim bohte nubbin, goalmmádin ja njealjádin.
Hoaas falimus
244 km gilvvu vuolgga lei Kárášjogas ja áltálaččat Asgeir Hoaas ja Sveinung Ryan olliiga ovddemus mollii. Soai ádjáneigga badjelaš gávcci diimmu sihkkelastit Kárášjogas Áltái.
Leavdnjalaš Trond Olsen vuittii bronssa dán gilvvus.
Kárášjohkalaš Kato Norvang vuittii 244 km 40-49-jahkásaččaid klássa. Dás bođiiga leavdnjalaččat John Sigurd Hansen ja Even Johansen nubbin ja goalmmádin.
Garra biegga
Ráirru sihkkelasti Odin Foldvik Eikeland vuittii 174 km klássa. Son ádjánii Leavnnjas Áltái vihtta diimmu ja 13 minuhta.
Son lei hui duhtavaš sihkkelastimiin ja dálkkiin, vaikko Suoidneleavššis lei oalle garra biegga.
– Muhtumin gal lei oba lossat. Leavnnjas Leaibevutnii gal manai oalle leahtuin, muhto Suoidneleavšši badjel gal lei garra mentála bargu, go doppe bosui oalle garrasit. Measta juo gevven doares beallái, muitalii váiban, muhto ilolaš vuoiti Altapostenii maŋŋel gilvvu.
Dás bođii romsalaš Brynjar Ottesen nubbin.
Buot bohtosiid gávdná dán neahttasiiddus.
