Čakčamánus vuosttaš beaivvi finai oljo- ja energiijaministtar Tina Bru Vuorašnjárggas Álttá suohkanis geahččamin vahágiid maid njárbaleaira uđas dagahii guvlui geassemánu goalmmát beaivvi.
Geassemánu goalmmát beaivvi fierai leairauđas merrii Vuorašnjárggas Álttá gielddas. Ii oktage olmmoš duššan, muhto uđas njámastii gávcci viesu, geainnu ja stuora eananbihtá merrii.
Mannan maŋŋebárgga finai oljo- ja energiijaministtar Tina Bru guovllus ja háleštii olbmuiguin geat vásihedje leairauđđasa ja maiddái NVE:in geat leat dutkamin guovllu gos uđas manai. Gulaimet olbmuid muitaleamen mo sii moatti minuhtas masse barttaideaset ja osiid iežaset eatnamiin, njuorasmahtii stáhtaráđi. Beana mii lei šaddan uđđasa mielde, nagodedje lihkus gádjut.
Dákkár leairauđđasat mat fierralit guovlluin gos leat dálut, leat duođalaš dáhpáhusat ja gearggusvuođadusten lea hástaleaddji. Dán oktavuođas ásahedje jođánit ovttasbarggu gaskal Álttá suohkana, politiijaid ja NVE:a. Stáhtaráđđi beasai gullat man dehálaš dákkár ovttasbargu lea. NVE lea hui duđavaš vugiin mo Álttá gielda čuovvulii ášši.
NVE Anders Bjordal muitala sii leat dál ovttasráđiid Stáhta geaidnodoaimmahagain, NTNU, NGI, NGU ja Multiconsult ásahusaiguin dutkamin siva uđđasii. Leat biddjon teknihkalaš mihtidanrusttegat eatnamiid mihtidit birra jándora vuođđočáhcedási. Dát dieđut biddjojit eanadássedisárvvoštallamii mat jáhkkimis sáhtášedje muitalit guovllu njárbaleairra iešvuođaid birra.
