-Almmuhus-
-Almmuhus-
-Almmuhus-
SMÁVVAOĐĐASATOlgoriikka­studeanttat besset boahtit Norgii borge­mánu vuosttaš beaivvi rájes 

Olgoriikka­studeanttat besset boahtit Norgii borge­mánu vuosttaš beaivvi rájes 

-

-

Ráđđehus lea mearridan ahte olgoriikastudeanttat ja oahppit besset spiehkastit sisriikkaráddjehusain borgemánu vuosttaš beaivvi rájes. Dat mearkkaša ahte olgoriikastudeanttat ja oahppit, geain lea oahpposadji dahje skuvlasadji Norgga oahpahusásahusas, besset boahtit Norgii. 

– Mun sávan olgoriikastudeanttaide ja ohppiide bures boahtima Norgii borgemánus. Midjiide lei dehálaš čilget dán ášši dál, nu ahte studeanttat ja oahppit besset ráhkanišgoahtit vuolgit Norgii. Vaikko mii dál addit sidjiide vejolašvuođa boahtit, de fertejit liikká čuovvut erren- ja iskadannjuolggadusaid, lohká dutkan- ja alit oahppoministtar Henrik Asheim ráđđehusa preassadieđáhusas.

Norga ásahii garra sisaboahtin gáržžidemiid ođđajagemánu 29. beaivvi 2021 ja dan rájes leamaš measta veadjemeahttun olgoriikastudeanttaide ja ohppiide beassat Norgii. Dál go njoammundilli lea buorránan ja eatnasat boahkuhuvvon, de lea maid vejolaš geahpedit sisaboahtingáržžidemiid. 

Almmolaš njuolggadusat mat gusket sisaboahtinvisumii ja orrunlohpái Norggas gustojit ain. Dat mearkkaša ahte studeanttat ja oahppit geat leat ožžon saji Norgga oahpahusásahusain, fertejit ohcat nu go dábálaččat orrunlobi Olgoriikkadirektoráhtas ovdalgo besset Norgii boahtit.

Sisaboahtinnjuolggadusat maid Norga lea ásahan, galget suddjet ahte olgoriikkain eai čuovut njoammuma ja virusrievdademiid. Máhttodepartemeanta vuordá ahte universitehtat ja allaskuvllat mákset dan oasi maid olgoriikastudeanttat šaddet ieža máksit errenhotellii, gos šaddet orrut go bohtet Norgii vuosttaš geardde. Rievdadus biddjo fápmui 01.08.21.

-Almmuhus-