-Almmuhus-
OĐĐASATOlgoriika ageanta Barentsguovllus

Olgoriika ageanta Barentsguovllus

-

-

“Yasavey Manzara” nenetsasearvi lei navdojuvvon “olgoriika ageantan” Ruošša justisdepartemeantta bokte mannan gaskavahku.

“Yasavey Manzara” lea vuosttaš álgoálbmogiid searvi Barentsguovllus mii lea biddjon “olgoriika ageanta” listui justisdepartemeantta eiseválddiiguin, dieđiha BarentsObserver.

Skábmamánu 21. beaivvi jagi 2012:s dohkkehii Ruošša federála parlameanta Duma sierra federálalága nummir 121 man sisdoallu guoská buotlágan servviide, namalassii daidda main leat oktavuođat ja ovttasbargu olgoriikkaservviiguin. Lága bokte eiseválddit háliidit oažžut ipmárdusa man ollu searvvit Ruoššas ovttasbarget olgoriikkaservviiguin ja man galle searvvi ožžot ruhtadeami. Searvvit galggašedje eaktodáhtolaččat dieđihit iežaset sierra registarii. Jagiin 2012-2014 lea Ávvir dieđuid mielde okta searvi čuovvolan eiseválddiid ávžžuhusaide. Geassemánu 4. beaivvi 2014:s dohkkehii Ruošša Presideanta ja vuolláičálii lága rievdademiid, man bokte Justisdepartemeanta oažžu eanet válddi, namalassii sáhttá departemeanta ieš álggahit guorahallama vaikko makkár servviin jus dás lea dáhttu.

 

Justisdepartemeantta čilge iežas ruovttosiiddus ná mii lea “olgoriika ageanta”:

– Lea Ruššii gullevaš searvi mii oažžu ruđalaš doarjaga, eará opmodaga ja rusttegiid olgoriikkas, ja lea dat searvi mii bargá olgoriikka beroštumiid vuođul, ja seammás ovddida olgoriikka beroštumiid politihkalaččat Ruoššas.

 

Justisdepartemeantta dieđuid mielde, leaš dal searvin álggu rájes, gos ledje jo politihkalaš doaimmat ulbmilin dahje eai. Muhto jus searvi searvá politihkalaš dilálašvuođaide olgoriika ruhtadeami bokte ja geahččala váikkuhit stáhtapolitihkaáššiid mearrádusaide, dahje searvi geahččala rievdadit servodaga oainnu áššái, de dat sáhttá leat vuođđun searvvi navdit “olgoriika ageantan”.

Ii leat buorre

– Dá lea hui heittot riikkaidgaskasaš ovttasbargui álgoálbmogiidda Barents guovllus, ja dat addá vuođu vuorjašupmái makkár dilli servodagas lea Ruoššas, lohká Barents čállingotti álgoálbmotáššiid ráđđeaddi Anja Salo.


Govven: Thomas Nilsen                 

“Yasavey Manzara” lea diehto- ja dutkanguovddáš mii lei vuođđuduvvon 2003:s Nenetsa autonoma guovllus Ruoššas. Searvi lea válljen čuovvovaš bargosurggiid: dutkan, konsultašuvdna, guorahallan, diehtojuohkin, almmuheapmi, ja dutkan servodaga proseassaid.

 

Ávvir ii leat lihkostuvvan oažžut oaiviliid “Yasavey Manzara” bealis ášši ektui.

-Almmuhus-