Norgga našunála olgoáibmodoaimmaidorganisašuvnnain leat badjel 800 000 miellahttu - ja lohku lea ollu lassánan maŋemus jagi.
Norgga našunála olgoáibmodoaimmaidorganisašuvnnain leat badjel 800 000 miellahttu - ja lohku lea ollu lassánan maŋemus jagi.
– Meahcástallan lea bajimus astoáigedoaibma Norggas, ja miellahttulogu lassáneapmi čájeha ahte eambbogat leat olgoáimmus, muitala Norgga olgoáibmodoaimma váldočálli Lasse Heimdal.
Idjadalle luonddus
Váldočálli ii loga nu hirpmáhuhtti go lohku lea lassánan, go diehtá man ollugat lávejit fitnat olgun luonddus, ja vel go diibmá lágiduvvui Olgoáibmojahki 2015.
– Máŋga čuođiduhát olbmo ledje olgun luonddus mannan jagi. Politihkkarat, sátnejođiheaddjit ja eará olbmot idjadalle luonddus ja giccodedje muorain. Measta milliuvnna olbmot lohket fitnan luonddus diibmá, ja juohke njealját váhnen ovttas mánáin lei eambbo olgun, muitala Heimdal.
Joatkit leat luonddus
– Hástalus dál lea oažžut olbmuid joatkit finadit luonddus ja nannet doaibmadási boahttevaš jagiid. Dan mii eat nagot jus ráđđehus ii joatkke olgodoaimmaiguin viidáset, lohká Heimdal.
Eai dušše miellahtut
Leat eambbogat geat leat luonddus go dušše miellahtut olgoáibmodoaibmaorganisašuvnnain Norggas. Badjelaš 90 proseanta álbmogis fitnet luonddus, čájehit iskosat.
– Lohkku lea hui allat, ja ii leat dárbu leat miellahttu gostege jus háliida luonddus leat. Ollugat ohcet luonddu jaskesvuođa. Dán fertejit politihkkarat fuomášit, ja heivehit nu ahte luonddu besset buohkat ávkkástallat, deattuha Heimdal.
