-Almmuhus-
-Almmuhus-
-Almmuhus-
OĐĐASATOlgešbellodat háliida ovttastahttit Finnmárkku ja Romssa

Olgešbellodat háliida ovttastahttit Finnmárkku ja Romssa

-

-

Nordlándda, Romssa ja Finnmárkku Olgešbellodagat leat ovttaoaivilis ja ávžžuhit Stuoradikki juohkit Davvi-Norgga guovtti guovlun mas fylkkarádji galgá leat Romssa ja Nordlándda gaskkas.

Fylkkabellodagat dohkkehit maid rádjeheiveheami jus rádjeguovlu ieš dáhttu dan.

Váldočuokkis lea ahte fylkkagielda hálddašeaddjin berre heaittihuvvot, ovdamunnin das oaivvildit leat ahte de šaddet stuorát ja gievrrat suohkanat, dieđiha Olgešbellodat preassadieđáhusas.

 

Bisuhit Nordlándda sierra guovlun

Nordlándda gal háliidit bisuhit sierra guovlun.

– Mii leat čađahan siskkáldas proseassa fylkkabellodagas Davvi-Norgga guovlluođastusa birra. Proseassas leat iešguđetlágan oaivilat, muhto eanetlohku háliida ahte Nordlánda bissu sierra guovlun. Davvi-Norgga Olgešbellodat lea ovttaoaivilis oktasaš kompromissain mainna mii leat hui ilus, lohká Nordlándda Olgeža jođiheaddji Jonny Finstad preassadieđáhusas.

 

Heivehit fylkkaráji

Romssa Olgeš rievttimielde lea háliidat bisuhit golbma fylkka Davvi-Norggas.

– Romssa Olgeš lea leamaš ja lea ain dan ipmárdusas ahte min vuođđojurdda lea Davvi-Norga mas leat golbma fylkka. Mii leat ipmirdan ahte dan lea váttis čađahit, ja dan dihte doarjut dan oktasaš evttohusa Olgešbellodagain davvin. Romssa Olgeš bidjá vuođđun ahte addo vejolašvuohta heivehit guovlluráji Nordlándda ja Romssa gaskkas, mas optimála heiveheapmi váldo vuhtii oktasaš orrun- ja bargomárkana ektui, ja almmolaš doaimmaid organiseremiid ektui jus lea dárbu dasa, dadjá Romssa Olgeža jođiheaddji Geir Inge Sivertsen.

 

Finnmárkkus buorre gulahallan Romssain

Finnmárkku Olgešbellodaga jođiheaddji Jo Inge Hesjevik doarju maid Romssa Olgeža.

– Finnmárkku Olgeš háliida ođđa guovllu mas leat Romsa ja Finnmárku ovttas. Mii oaidnit ahte bargguid, maid galgat čoavdit johtolagas ja joatkkaskuvllaid ektui, sáhttit čoavdit buorebut go dál. Go galgat ráhkkanahttit guovlluid ođđa doaimmaide, de oaidnit Romssa ja Finnmárkku lunddolaš oassin min oktasaš guovllus. Dál lea oassi Finnmárkku dehálaš dearvvašvuođa- ja oahppoinstitušuvnnain Romssa fylkkas. Buorre gulahallan Romssain addá oadjebasvuođa ahte bargosajit main leat ođđa doaimmat biddjojit miehtá guovllu, muitala Finnmárkku fylkkajođiheaddji Jo Inge Hesjevik preassadieđáhusas.

 

 

-Almmuhus-