Ođđajagemánu 11. beaivvi rájes leat 21 várrehusa boahtán mat gusket 12 olbmui Olgešbellodagas. Logi várrehusa leat Kristian Tonning Riise vuostá.
– Min searvvis lea mis ovddasvástádus ahte buohkat, geat leat doaimmas min bellodagas, vásihit oadjebasvuođa. Maŋemus vahkkuid leat ožžon dieđuid ahte buohkat eai leat dovdan oadjebasvuođa. Mii leat beahttán miellahtuid dain diliin go sii dárbbašedje min buot eanemusat. Lea lossa ášši Olgešbellodahkii ja Olgešbellodaga Nuoraide dovddastit, dadjá váldočálli John-Ragnar Aarset.
Čorgejit dili
Dál áigu Olgešbellodat čorget dili bellodagas, ja ásaha ortnega movt galget čoavdit seksuálalaš loavkašuhttimiid go dat ilbmet.
Bellodaga jođiheaddji, Erna Solberg, lohpida albma ládje čorget dili ja čuovvolit buohkaid geat dieđihit. Olgešbellodat galgá maid veahkehit juridihkalaš vehkiin ja eará vehkiin.
Muhtin oasit mat leat doaimmas
Dan botta go vurdet lávdegotti gieđahallat dieđihemiid, de leat bidjan muhtin doaimmaid johtui. Buot várrehusat galget čálalaččat leat loggas, ja váldočálli galgá maid dovdat ášši.
Sierra várrehussadji galgá ásahuvvot mas lea sorjjasmeahttunvuohta. Álggahanprográmma ođđa jođiheddjiin Olgežis, Nuorra Olgežis ja eará bargiin galgá šaddat buoret.
Alkoholageavaheami bellodaga doaluin ferte guorahallat. Ehtalaš njuolggadusaid ja seksuálalaš loavkašuhttima diđolašvuohta galgá lassánit juohke dásis.
Heajos beaggimat váikkuhit
– Mun lean balus ahte dakkár áššit váikkuhit politihka integritehta ja rekrutterema go dakkár áššit hásttuhit min luohttevašvuođa. Mun oaivvildan ahte dát lea nu dehálaš ahte bovden buot eará bellodatnjunnošiid oktasaš čoahkkimii, loahpaha Erna Solberg.
