Guovdageainnu Olgeš lea stivračoahkkimis mearridan geassádit ovttasbarggus Dáloniid Listtuin. Dasto lávke Olgeš eret Guovdageainnu suohkanstivrra eanetlogus.
Nu čállá Guovdageainnu Olgeš iežas Facebook-siiddus.
– Olgeš ii doarjjo bargovugiid mat leat boahtán ovdan medias maŋemus mánuid. Ii leat dohkálaš ahte eaŋkil politihkkárat áitet suohkana bargiid, go sii leat deháleamos resursa čađahit politihka maid suohkanstivra mearrida.
Ávvir lea maŋimuš vahkuid čállán movt suohkandirektevra Kent Valio lea givssiduvvon.
Olgežis lei odne eahkedis stivračoahkkin. Guovdageainnu Olgešbellodaga jođiheaddji ja suohkanstivraáirras Ante J. Bals ii dáhto ášši justa dál kommenteret.
– Mus eai leat eanet kommentárat go diet mii čuožžu min Facebook-siiddus, lohká son.
Ávvir čuovvula ášši.
