-Almmuhus-
-Almmuhus-
OĐĐASAT Olgeš evttoha váldit eret 2,5 km vuodjin­rájá bartii

Olgeš evttoha váldit eret 2,5 km vuodjin­rájá bartii

-

-

– Mii sáddet gulaskuddamii evttohusa váldit eret 2,5 km guhko vuodjinrájá bartii. Dál lea Stuorradikkis eanetlohku mielas váldit eret dan rájá, lohká Finnmárku Olgešbellodaga stuorradiggeáirras Anne Karin Olli.

Finnmárkku Olgešbellodaga stuorradiggeáirras Anne Karin Olli lea guhká bargan dan nammii ahte báikkálaččat sáhttet mearridit sáhttá go muohtaskohteriin vuodjit iežas bartii. 

– Gulaskuddamis mii áiddo lea čađahuvvon mohtorjohtolaga njuolggadusain, dieđihedje olusat ahte sii ávžžuhit dán 2,5 km rájá váldit. Dál duste ráđđehus dáid gulaskuddamiid ja bargagoahtá dan nammii ahte 2,5 km gáibádusa sáhttá váldit eret. Mun illudan go dan dahket. Finnmárkku Olgešbellodahkii lea dát dehálaš ášši ja olusiidda sihkkarit illubeaivi, lohká stuorradiggeáirras Anne Karin Olli ilus. 

Eai vuordde Stuoradikki mearrádusa

Son muitala dál boahtá muhtin áirasis evttohus mii galgá meannuduvvot Stuorradikkis ja dál lea juo čielggas ahte lea eanetlohku dán 2,5 km rájá eret váldit. 

– Ráđđehus ii hálit vuordit Stuorradikki mearrádusa ovdal go bargagohtet rievdadit dán njuolggadusa, muhto sádde otne, cuoŋománu 30. beaivvi, dán evttohusa gulaskuddamii. Lea gáibádus ahte buot njuolggadusrievdadeamit galget lágalaš gulaskuddamii ovdal go ráđđehus sáhttá daid mearridit. Dát gusto maid Stuorradikki mearrádussii. Buot dáid jurdagiid maid leat ožžon gulaskuddamis njuolggadusaide mohtorjohtolagas meahcis, de bargagoahtit mii dalán dáinna bargguin, lohká Anne Karin Olli. 

Son čilge ahte Ráđđehus sádde dál guokte evttohusa njuolggadustekstii ja guktot evttohusain evttohuvvo váldit eret dan 2,5 km rájá. Nubbi evttohus váldá maid eret láigovuodjima, ja dat nubbi fas doalaha dálá gáibádusaid láigovuodjima birra ja lasiha guđemuš skohterlahtuide dat gusto ja man gallii sáhttá vuodjit. 

-Almmuhus-