Ole Rune Hætta luohpá doaimmaheaddjin NRK Sámis.
NRK dieđiha preassadieđáhusas ahte NRK Sámi direktevra Mona Solbakk almmuhii odne ahte Ole Rune Hætta luohpá doaimmaheaddjevirggis NRK Sámis ja álgá guovtti stuorát prošeavtta prošeaktajođiheaddjin seamma divišuvnnas.
Son galgá jođihit organisašuvnna ovdánahttinprošeavtta, ja jođihitja ovdánahttit ođđa ráiddu mainna leat bargame. Guovvamánu 1. beaivvi rájes álgá ođđa ámmáhii.
– Mun áiggun giitit Ole Rune dan buori barggu ovddas maid lea bargan doaimmaheaddjin. Son lea hui dehálaš leamašan NRK Sámi ovdánahttimii. Son lea čájehan beroštumi ođasmahttimii ja ovdánahttimii, seammás go lea doalahan min árvvu seailluhit sámi gielaid ja kultuvrra. Go dál vállje heaitit doaimmaheaddjin, de lean ilus go bargagoahtá prošeavttaiguin, dadjá Mona Solbakk preassadieđáhusas.
Ođđa doaimmaheaddji
Solbakk muitala preassadieđáhusas ahte lei dárbu ahte Hætta sáhtii jođánit jođihišgoahtit prošeavttaid, ja danne leat konstitueren gaskaboddosaš doaimmaheaddji.
Jo Raknes. Raknes lea NRK Ovdánahttinossodagas, ja galgá doaibmat doaimmaheaddjin dassá go ođđa bissovaš doaimmaheaddji lea sajis.
