-Almmuhus-
OLBMOT SÁMISOle K. Hætta 80 jagi

Ole K. Hætta 80 jagi

-

-

Ole K. Hætta, Stornes/Čohkadievvá.

Okta dain searamus boazobargiin áiggi mielde devddii 80 jagi 21.10. 21.

Ovllá álggii juo nuorran bargat bohccuiguin. Álggos reaŋgan ja nu son dinii ja gártadii ealu alccesii. Go oláhišgođii agiid ala, de bijáhii bohccuidis bártneguoktái ja nu bistá ge su boazonálle ain seailumis. Ovllá ieš maid áŋgirušša leat veahkkin siiddas, dávjá sihke johtima oktavuođas ja miessemearkumis. 1970 lei son válljejuvvon Finnmárkku Fylkii áirrasin ja barggai áŋgirit ovddidit boazoealáhus áššiid.

Ovllá lea čađat birgen luonddus ja heivehan eallima ja čehppodaga dasa. Son dovdá eatnamiid buorebut go alla oahppan skuvla olbmot. Ovllá diehtá dološ árbevieruid, movt olbmot birgejedje luonddu riggodagain, movt sii vánddardedje ja ásse báikkiin ja orohagain. Boazodoallu leage su váimmu bargu ja dan son gal máhttá čađančuovgga. Eai leat gallis geat máhttet muitalit orohagaid, johtolagaid, máđijaid ja sámisogaid birra ja eatnama namahusaid go son. Boazodoalus ja luonddus hálddaša olu dološ fágasániid. Máŋggas leat jearahan sus ráđiid ja dieđuid sámi árbevirolaš diehtagiin. Oaččot jearrat sus dálkemearkkaid birra ja dat mat gusket dasa, na son gal vástida nu juste go lea. Boazodoalus dovdá buot mearkkaid ja diehtá gosa ja man sohkii gullet. Lávejit muitalit go Ovllás jearrá mearkabohccuid birra ja guđe siiddas dahje guovllus leat oidnon, na de son gal diehtá ja vástida njuolga gos lea oaidnán ja muitala maid gean mearkkas dat bohccot leat. Sámisoga birra diehtá maid, ii dušše lagas birrasis, muhto buolvvaid obba Sámis. Máhttá muitalit movt fuolkevuođat ja sogat leat čadnon oktii.

Nuorran son álggii bohccuiguin bargat. Gullon lea maid ahte suohpangiehta sus lei deaivil ja spáillihiid  duohpalii ja bonjastii čippevuollai. Áiggi mielde lea vuđolaččat oahpahan iežas mánáide ja áddjubiidda boazo- ja meahccebargguid, bivdduid ja buot luondduriggodagaid birra. Boazobarggut leat rievdan ođđamállet vugiide, sihke álkibun ja váddáseabbon. Ovllá lea vásihan daid beliid ja nagodan doalvut dán árbevieru viidásit iežas maŋisbohttiide. Su luođi juoiggastit ja dajahallet searran ja bozolažžan. Dat lea stuora árvu ja gudni sutnje.

Mii sávvat sutnje olu lihkku ain viidáseappot.

Dearvvuođat buohkain bearrašis, eamidis Iŋggás, mánáin, áddjubiin, manjis, sásain, oappáiguin ja vieljaiguin.

-Almmuhus-