Øvrebygd nuorat leat čoaggán gaskal 1000 ja 1500 lihttera ruskkaid Dieváidvuovddi álbmotmeahcis. – Go leat meahccemátkkis, de lea vuogas vierru máhcahit biergasiid ja biepmuid fas ruoktot. Jus gávnnat diŋggaid, de válddát daid maid mielde, lohká Andreas Fosslund Karlsen.
Øvergård Montessoriskuvla ja Bjørkeng bajásšaddanguovddáš leat leamaš ruskaakšuvnnas Ánjájávregáttis ja gávdne biepmuid, jiekŋabovra, sahá, tealttá, tealtasákkiid, vodka ja goaivvuid roggojuvvon eatnamii, čállá Romssa Fylkkamánni sin neahttasiiddus.
Hivssetbáhpiriid ja basadanservieahtaid gávdne maid.
– Jus galggat earánastit, de galggašit váldit hivssetbáhpira fárrui dahje boaldit dan ovdal go vuolggát, lohká Jan Sverre Gjerdrum.
– Eai boađe šat ruovttoluotta
Dieváidvuovddi álbmotmeahci hálddašeaddji Bjørn Morten Baardvik jođihii akšuvnna, ja lohká guollebivdiid ja eará bivdiid guođđit ruskkaid meahccái, čállá fylkkamánni sin neahttasiiddus.
– Olbmuin leat beare ollu diŋggat mielde, eai ge nagot šat guoddit daid ruovttoluotta go vulget fas ruoktot, ja nu de rogget daid vulos, go doivot boahtit fas ruovttoluotta eará háve. Biergasiid eaiggádat eai boađe gal šat ruovttoluotta, lohká Baardvik.
Guhkki šibitdoaktárii
Álbmotmeahci hálddašeaddji lohká ollugiid vánddardit beatnagiiguin. Jus beana soardá juolggi lásemoaluide mat leat dollagáttis dahje eatnamis, de lea hui guhkes mátki beassat šibitdoaktára lusa.
– Boazoealáhus geavaha daid guovlluid, ja boazu sáhttá maid skihpat jus borrá plastihka dahje sordo ruskkaide, lohká Baardvik.
