-Almmuhus-
OĐĐASATOlbmot diŋgo­goahtán várálaš korona­dálkasiid neahtas

Olbmot diŋgo­goahtán várálaš korona­dálkasiid neahtas

-

-

Duolloetáhtta váruha diŋgomis dálkasiid. Sáhttá leat vaikko narkotihkka dain. 

Máŋga dain dálkasiin, maid gohčodit koronadálkkasin, sisttisdollet narkotihka, ja lea oassi maid main ii leat makkár ge doaibma. Duolloetáhtta váruha olbmuid diŋgomis dakkár dálkasiid neahtas mat bohtet olgoriikkas. Covid-19 oktavuođas lea Duolloetáhtta bissehan oalle ollu medisiinnalaš buktagiid mat ledje vuolggahuvvon geavaheddjiide Norggas. Leat máŋga dálkasa maid gohčodit «koronadálkkasin». Laboratoriijaiskosat čájehit ahte dálkasiin ii leat dat ávnnas mii lohpiduvvo.

Buot vearrámus mii sáhttá dáhpáhuvvat lea ahte lea narkotihkka dain dálkasiin, ja ahte sáhttá leat várálaš dearvvašvuhtii, čállá Duolloetáhtta preassadieđáhusa bokte ja váruha olbmuid diŋgomis dakkár dálkasiid neahta bokte mat bohtet olgoriikkas.

Sáhttet várálaččat

– Duođaleamos gávnnus muhtin buktagiin mat gullet Kiinná árbevirolaš dálkkodeapmái, lei narkotihkka maid dain. Muhtin dálkasiin sáhttet leat ávdnasat mat eai doaimma nu bures, ja soames buktagiin ii lean makkár ge ávki.Ii okta ge sáhte leat sihkar maid sii diŋgojit neahta bokte olgoriikkas. Sáhttá leat heaggavárálaš ieš váldit dálkasiid mat eai leat dat maid doaivu, váruha duollolaboratoria jođiheaddji Arnvid Gunnar Lie.

Buktagiin leat dušše dárkkistan leat go ávdnasat main lea narkotihkka, dopa ja dálkasat. Eará várálaš ávdnasiid eai leat dárkkistan, mat sáhttet leat mikroorganismmat, lossametállat ja eará mirkkut. Eai leat dárkkistan lea go ávnnasmearri nu allat go dat mii čuožžu buktaga olggožis, dieđiha Duolloetáhtta.

-Almmuhus-