Ođđa iskkus čájeha ahte olbmot ballet eanet johtolat- ja biilalihkohisvuođain go dávddain.
Seammás dadjá okta olmmoš juohke viđát olbmos ahte eai dieđe maid galggašii dahkat jus bohtet vuosttažin lihkohisvuođabáikái.
– Jus boađát lihkohisvuođabáikái, de galggat vuos sihkkarastit lihkohisvuođa báikki, dieđihit 113 ja dasto veahkehišgoahtit roasmmehuvvan olbmuid. Lea dehálaš ahte máhtát vuosttaš heahteveahki, čilge Norsk Luftambulanse vuođđudusa doavttirhoavda Stephen Sollid preassadieđáhusas.
Ballet eambbo go dávddain
Varas iskosis, maid Ipsos lea čađahan Stiftelsen Norsk Luftambulanse ovddas, háliidedje diehtit mas olbmot balle eanemusat, lihkohisvuođain vuoi fáhkka buozalmasvuođain. 47 proseantta balle eanemusat johtolat- dahje biilalihkohisvuođain, borasdávddas (25 %), váibmosivain, pandemiija/covid-19 (12 %), vuoiŋŋašvardin (8 %) ja buollin (6 %).
– Vaikko Norgga geainnut ja norgalaš biilavuoddjit leat sihkkaramos máilmmis, de liikká vásihit olusat johtolatlihkohisvuođaid ja dasa gullevaš váivviid, lohká Stáhta geaidnodoaimmahaga johtolatsihkkarvuođa ossodatdirektevra Guro Ranes.
Jahkásaččat masset 100 olbmo heakka johtolagas ja gaskal 550-650 olbmo roasmmehuvvet duođalaččat, dan čájeha SSB lihkohisvuođastatistihkka. Eanaš lihkohisvuođat gevvet geasset.
– Jus it dieđe, riŋges 113. Doppe rávvejit maid galggat bargat. Várut ahte dutnje ii geava mihkkege, riŋge 113 ja čuovo rávvagiid ja bagadeami, de manná bures. Ale vuordde ahte earát váldet ovddasvástádusa, lohká Sollid.
– Oahpa vuosttaš heahteveahki. Sáhttá váldit áiggi dassái oahppanolbmot bohtet báikái. Du veahkki sáhttá gádjut heakka, deattuha Guro Ranes .
Norsk Luftambulanse lea ráhkadan nuvttá vuosttašheahtekurssa, Akutt ABC.
