-Almmuhus-
OĐĐASATOlahus: Eai goasse ná unnán duššan buollimis

Olahus: Eai goasse ná unnán duššan buollimis

Journalista

-

-

Eai goasse leat nu unnán duššan buollimiin go vássán jagi. Ođđa logut čájehit ahte 25 olbmo dušše diimmá buollimiin.

– Lea hirbmat buorre ovdáneapmi, ja čájeha ahte eastadandoaimmain lea ávki. Oaidnit maid ahte leat unnit buollimat, sivat sáhttet olu, muhto okta stuora ágga sáhttá go olbmot leat eanet dihtomielalaččat, lohká Øyvind Setnes, Tryg Forsikring dáhkádusfitnodagas preassadieđáhusas.

 

Eatnasat dušše ruovttuin

Diimmá jagi logut čájehit ahte ledje 14 dievddu ja 11 nissonolbmo geat dušše buollimis. Cuoŋománu dušše viđas, dat lea alimus lohku.

Golmmas dušše juovlamánu, ovddit jagi dušše gávccis seamma mánu.

Beaivi go eanemusat dušše, lei lávvordat. Čiežas dušše lávvordatbeaivvi. Eatnasat dušše ruovttus.

– Mii bargat juohke áidna beaivvi dan ala vai olahit olbmuide man dehálaš eastadanbargu lea. Mii leat maid geavahan VR-teknologiija, mii čájeha makkár buollin sáhttá leat, ja dát orru fuomášuhttán olbmuid. Sávvat ahte dát joatká ođđa jagis, lohká Setnes.

 

Finnmárkkus buollin juohke viđat beaivvi

Jus geahččá álbmotlogu dáfus, de leat Oslos ja Finnmárkkus eanemus buollimat. Oslos leat 96,59 buollima juohke 100 000 ássi nammii.

Finnmárkkus fas 91,93 buollima juohke 100 000 ássi nammii.

Oktiibuot ledje 70 buollima Finnmárkkus, mii lea measta okta buollin juohke viđat beaivvi.

-Almmuhus-