Sotnabeaivvi eahkedis lei oktiibuot 179 olbmos Finnmárkkus duođaštuvvon korona. 154:s dain olbmui leat Hámmerfeasttas.
Hámmerfeastta suohkan lea olles leahtuin iskosiid váldime olbmuin. Ikte ledje birrasii 400 olbmo geat iskojuvvojedje.
Dássážii lea 154 olbmos Hámmerfeasttas duođaštuvvon korona. 74 dáin olbmuin duođaštuvvui korona sotnabeaivvi. Otná logut eai leat vel almmuhuvvon.
Hámmerfeasttas ásset 11 300 olbmo. Badjel 1000 olbmo, namalassii juohke logát ássi, leat dál erremis ja badjel 500 olbmo leat velá bivdán iskkahuvvot. Máŋgasis sis leat dovdomearkkat.
Hámmerfeastta sátnejođiheaddji Marianne Sivertsen Næss jáhkká korona-loguid velá lassánit. Sivertsen Næss lohká iežas váivašuvvan. Son jáhkká vel eambbosiin leat korona.
– Dilli lea duođalaš ja doaibmabijut leat eambbo go goassege ovdal. Dáppe lea dál visot giddejuvvon, maiddái skuvllat ja mánáidgárddit. Nu šaddá olles dán vahku goit. Dál fertejit buohkat čuovvut gáržžidemiid ja njoammuneastadandoaimmaid. Buohkat berrejit bissut ruovttus, lohká Sivertsen Næss NTB:i.
Korona lea beassan leavvat Hámmerfeasttas árabut dán mánu dihto olgobáikkis. Leat eanaš olbmot gaskal 20–29 geaidda lea korona njommon.
– Logenáre olbmos geain lea korona leat maid mátkkoštan ja nu lea korona leavvan eará ge guovlluide, lohká son.
